Samfélagsmiðlastjarnan Alix Earle rifjar upp erfitt tímabil fyrir fjölskyldu hennar þegar faðir hennar lenti í hringiðu kynlífsskandals.

Alix Earle er ein vinsælasta TikTok-stjarnan í dag og var að byrja með hlaðvarpsþáttinn Hot Mess.

Margir aðdáendur hennar vita hins vegar ekki að fjölskylda hennar var mjög fræg um tíma, en það mætti segja að orðspor Earle fjölskyldunnar hafi orðið alræmt vegna skandalsins, en fylgdarkona og þáverandi ríkisstjóri New York tengdust málinu.

Alix var gestur í hlaðvarpsþættinum Call Her Daddy í gær og rifjaði upp örlagaríkan dag árið 2008 þegar hún, og heimurinn, komst að því að faðir hennar, Thomas „TJ“ Earle, hafi haldið framhjá móður hennar með Ashley Dupré, þáverandi fylgdarkonu.

Ashley var á þessum tíma ein frægasta fylgdarkona Bandaríkjanna því nýlega hafði komist upp um samband hennar og ríkisstjórans Elliot Spitzer. Þáverandi stjórnmálamaðurinn var gripinn glóðvolgur eftir að hafa eytt andvirði 320 þúsund króna fyrir nótt með henni. Hneykslið kostaði hann starfið.

Þegar komst upp um framhjáhald föður Alix og Ashley var heimili Earle fjölskyldunnar umkringt paparazzi ljósmyndurum.

„Ég mun aldrei gleyma þessum degi. Paparazzi ljósmyndarar voru fyrir utan heimilið en mömmu tókst að koma mér og systur minni út og til ættmenna. Við vorum þarna í nokkra daga og ég hafði ekki hugmynd um hvað væri í gangi,“ segir hún í þættinum.

Alix var aðeins átta ára þegar þetta gerðist og skildi ekki af hverju fjölmiðlar væru skyndilega svona áhugasamir um fjölskyldu hennar. Hún komst þó að sannleikanum nokkrum árum seinna.

„Það var í kringum fjórða bekk, ég varð vör við umtal um okkur og átti spjaldtölvu. Ég ákvað að googla fjölskylduna mína og allt í einu sá ég að síðustu tvö árin höfðu verið lygi,“ segir hún.

@spotifypodcasts Alix Earle got vulnerable discussing her family’s past public scandal and what her blended family looks like now #callherdaddy #alixearle #alexcooper #chd #podcasts #podcast ♬ original sound – Spotify Podcasts

„Pabbi hélt framhjá með konu sem var mjög þekkt fyrir starf sitt, fyrir að sofa hjá háttsettum karlmönnum og einn af þeim var ríkisstjóri New York. Hún varð mjög fræg út af þessu máli og þess vegna varð framhjáhald pabba svona mikið stórmál í fjölmiðlum.“

Alix segir að á þessu augnabliki hafi henni liðið eins og heimurinn væri að hrynja.

Móðir Alix, Alisa, og faðir hennar, TJ, skildu og giftist hann Ashley árið 2013.

Samfélagsmiðlastjarnan viðurkennir að það hafi verið erfitt að vera í kringum Ashley til að byrja með.

„Mér var skipað að vera kurteis við hana og góð, en mig langaði að ráðast á hana. Þetta var svo skrýtið því mér leið eins og það væri búist við að ég, tíu ára stelpa, væri þroskaðri en einhver sem var 20 til 30 árum eldri en ég.“

TJ og Ashley eru enn gift og hafa eignast saman þrjú börn. Alix er náin stjúpmóður sinni í dag og fjölskyldan er á góðum stað.

Horfðu á þáttinn hér.