Ekki er óþekkt að í spjallþáttum víða um heim séu sérstakir dagskrárliðir þar sem áhorfendum eru gefnar gjafir. Þetta er líklega hvað þekktast hjá spjallþáttadrottningunni Oprah, sem oft hefur sýnt af sér gífurlegt örlæti við áhorfendur í sal og falið ríkulegar gjafir undir stólum þeirra.

Eðlilega hafa fleiri spjallþættir tekið upp á þessum sið. Einn þeirra er þátturinn Cityline sem sýndur er á City TV sjónvarpsstöðinni í Toronto Kanada. Sá þáttur nær til rúmlega milljón áhorfenda í hverri viku en stjórnandi þáttarins er Tracy Moore. Um er að ræða vinsælasta lífsstílsþáttinn í Kanada.

Í þessari viku hófst svokölluð yfirhalningar vika, eða makeover week, sem er fastur árstíðabundinn liður. Til að keyra vikuna í gang átti sér stað dagskrárliðurinn Mega Makeover Madness þar sem 20 einstaklingar fengu yfirhalningu á einni og sömu klukkustundinni. Þar komu við sögu stílistar, snyrtifræðingar og hárgreiðslufólk sem sýndi hæfileika sína í kapphlaupi við klukkuna. Útkoman var glæsileg og þessir heppnu 20 þátttakendur gífurlega lukkulegir. Í lok þáttar kom þó í ljós að fleira óvænt var í vændum.

„Við erum með eitt í viðbót fyrir ykkur.“

Var þá spiluð stutt kynning á flugfélaginu PLAY, sem við Íslendingar könnumst vel við, enda íslenskt félag. Svo var þátttakendum sagt að þeir þyrftu að pakka niður því PLAY ætli að gefa hverjum þeirra gjafabréf af andvirði 500 kanadískra dollara, eða rúmlega 51 þúsund krónur.

En þetta var ekki allt, heldur mátti hver þátttakandi velja einn aðila sem einnig fær gjafabréf, enda vill enginn ferðast einn.

Þáttinn má sjá hér fyrir neðan, en PLAY-gleðin hefst á 41. mínútu.