Harry og Meghan hafa talað ítrekað fyrir nauðsyn þess að grípa til aðgerða gegn loftslagsbreytingum. Það breytir því ekki að hjónin ferðast ítrekað sjálf með einkaflugvélum sem bera ábyrgð á myndarlegum hluta gróðurhúsalofttegunda sem rata út í andrúmsloftið.
Nú síðast í gær ferðuðust hjónin til Las Vegas til að vera viðstödd tónleika með Katy Perry. Með í för voru Cameron Diaz, eiginmaður hennar Benji Madden og leikkonan Zoe Saldana. Einkaflugvélin er í eigu olíuerfingjans Michael Herd.
Fjölmargir hafa gagnrýnt hjónin á samfélagsmiðlum að því er fram kemur í frétt New York Post.
Angela Levin, sérfræðingur í málefnum bresku konungsfjölskyldunnar, segir í frétt The Sun að Harry sé enn verndari góðgerðasamtakanna Travalyst sem hvetja til sjálfbærra ferðalaga. Samtökin ættu með réttu að reka hann.
„Þau halda að þau séu orðin svo stór að þeim myndi aldrei detta í hug að fljúga á almennu farrými,“ segir hún.
Þess er getið í frétt The Sun að bróðir Harry, Vilhjálmur, hafi ferðast til Singapúr í gær með farþegaþotu British Airways innan um almenna borgara.
Þetta er ekki í fyrsta sinn sem hjónin komast í fréttirnar fyrir notkun þeirra á einkaþotum. Árið 2019 kom fram hörð gagnrýni eftir að hjónin fóru í fjórar slíkar flugferðir á aðeins ellefu dögum.
Þá voru þau gagnrýnd í fyrrasumar fyrir að ferðast á einkaþotu frá Kaliforníu til Bretlands á einkaþotu í tilefni af krýningarafmæli Elísabetar Englandsdrottningar heitinnar.
