Leikkonan Drew Berrymore hefur síðustu ár getið sér gott orð sem spjallþáttastjórnandi. Hún kom sér þó í klandur fyrir um mánuði síðan þegar tilkynnt var að þættir hennar færu í loftið samkvæmt áætlun þrátt fyrir verkfall handritshöfunda. Áttu þættirnir að halda sínu striki án handritshöfundanna sem við þá störfuðu, en þetta þótti blaut tuska framan í réttindabaráttu stéttarinnar.

Í kjölfarið afboðaði fjöldi gesta sig og leikkonan fékk yfir sig harða gagnrýni. Hún ákvað að bregðast fljótt við og tilkynnti að sýningu þáttanna yrði frestað þar til verkfallið væri leyst.

Nú er verkfallið búið og því hægt að hefjast handa að nýju, en framganga Drew er hvorki geymd né gleymd í tilviki þriggja handritshöfunda, þeirra Chelsea White, Cristina Kinon og Liz Koe, en allar þrjár hafa afþakkað að snúa aftur til starfa. Handritshöfundarnir þrír höfðu látið vel í sér heyra eftir að Drew boðaði óbreytta sýningu þáttanna. Þær efndu til kröfugöngu fyrir utan heimili leikkonunnar sem þær sögðu hafa afhjúpað skoðanir sínar á handritshöfundum – að þeir skipti hreinlega engu máli.

Þann 10. september ákvað leikkonan að verja ákvörðun sína og skrifað á netinu að hún stæði með ákvörðun sinni. Hún minnti á að hún hafi staðið með leikurum í þeirra verkfalli í vor og neitaði meðal annars að mæta á verðlaunaafhendingar, þó hún sjálf væri tilnefnd. Henni þætti leitt að þessi ákvörðun væri særandi fyrir handritshöfunda en hún væri ekki að fara að brjóta neinar verkfallsreglur og það væru fleiri störf í húfi en þeirra. Hún var grátklökk í myndbandi þar sem hún rakti þessa ákvörðun sína, en var þó fljót að eyða myndbandinu þegar það varð til þess að hún fékk harðari gagnrýni yfir sig, og nú frá nafntoguðum stórstjörnum. Kollegar Drew helltu sér yfir hana og sögðu hana grafa undan réttindabaráttu handritshöfunda. Hún væri að vinna á móti baráttunni og á sama tíma væri hún að væla í myndbandi og vorkenna sér fyrir að hafa fengið yfir sig gagnrýni.

Aðeins sjö dögum síðar birti Drew aðra færslu þar sem hún sagðist heyra gagnrýnina og hefði nú ákveðið að fresta sýningu þáttanna fram yfir verkfall. „Ég finn engin orð til að tjá hversu leitt mér þykir að hafa sært fólk, og þá sérstaklega frábæra starfsfólkið okkar sem vinnur við þættina og hafa gert þá að því sem þeir eru.“