Lisa Marie Presley var í öfgafullri megrun mánuðina fyrir andlát hennar því hún vildi líta eins vel út og hún gæti til að fagna kvikmyndinni Elvis á þeim fjölmörgu verðlaunahátíðum sem voru væntanlegar. Þetta hefur miðillinn TMZ eftir heimildarmanni úr fjölskyldi Lisu.

Tveimur mánuðum fyrir Golden Globe verðlaunahátíðina fór Lisa Marie í lýtaaðgerð og fór að taka inn megrunarlyf. Samkvæmt heimildum TMZ missti hún á bilinu 20-25 kg á sex vikum fyrir hátíðina.

Heimildir TMZ herma einnig að Lisa Marie hafi verið farin að taka inn ópíóða aftur – sem var fíkn sem hún hafði glímt við árum saman.

Lisa lét lífið eftir að hún fór í hjartastopp á heimili sínu þann 12. janúar, aðeins tveimur dögum eftir Golden Globe-hátíðina.

Dánarorsök hefur ekki verið opinberuð en beðið er eftir eiturefnaskýrslu sem gæti tekið einhverja mánuði að vinna.

Fjölskyldudeilur eru nú hafnar innan fjölskyldu Lisu en móðir hennar, Priscilla Presley, hefur lagt fram skjöl fyrir dómstóla þar sem því er haldið fram að breytingar sem Lisa Marie gerði á sjóð í hennar nafni árið 2016 hafi verið gerðar með sviksamlegum hætti. Breytingarnar fólust í sér að Lisa útnefndi börn sín, Riley Keough og Benjamin Keough sem meðstjórnendur sjóðsins, en áður hafði Priscilla gegnt þeirri stöðu. Benjamin er nú látinn svo sjóðurinn ætti samkvæmt þessari breytingu að renna í hendur Riley einnar.

Priscilla segir að breytingin sé grunsamleg þar sem þar sé nafn Priscillu misritað og auk þess hafi henni aldrei verið kynntar þessar breytingar á meðan Lisa Marie var á lífi, en slíkt sé skylda að gera samkvæmt skilmálum sjóðsins.

Eins sé undirskrift Lisu Marie ekki í samræmi við venjulega undirritun hennar.