Poppstjarnan Britney Spears er allt annað en sátt með nýjustu stjörnu NBA-deildarinnar, Victor Wembanyama, sem valinn var fyrstur í nýliðavaldi deildarinnar á dögum og er sagður vera einn efnilegasti leikmaður sem stigið hefur fram á sjónarsviðið um langt skeið.
Britney reyndi að heilsa upp á Wembanyama og biðja um mynd af sér með honum á veitingastaðnum Catch á Aria-hótelinu í Las Vegas í vikunni en ekki vildi betur til en svo að öryggisvörður NBA-stjörnunnar, Damian Smith, löðrungaði poppstjörnuna þannig að hún féll nánast til jarðar og missti gleraugu sem hún var með.
Sjónarvottar hafa greint frá því að þeir hafi heyrt háan hvell og síðan hafi Britney brjálast og meðal annars öskrað: „Þetta eru andskotansBandaríkin!!“
Fyrstu fregnir úr herbúðum Wembanyama voru á þá leið að Britney hafi rifið í hann og því hafi öryggisvörðurinn brugðist við með þessum hætti. Þá var leikmaðurinn sjálfur spurður út í málið af blaðamanni eftir æfingu hjá liði hans San Antonio Spurs þar sem hann staðfesti þá sögu, hló og gerði lítið úr málinu.
Britney opnaði sig um sína hlið á Instagram-síðu sinni í kjölfarið og sagði NBA-stjörnuna fara með rangt mál. Hún hafi pikkað vinalega í öxl hans og því hafi viðbrögð öryggisvarðarins verið út úr korti. Benti hún á að æstir aðdáendur hafi hópast að henni á veitingastaðnum þetta kvöld en öryggisverðir hennar hafi ekki beitt neinn slíku ofbeldi.
„Ég kann ekki að meta þetta og né tel ég þetta vera léttvægt mál. Að sjá leikmanninn brosa og hlægja af því er illkvittið og niðurlægjandi í ljósi þess hvað átti sér stað. Ég er 160 cm en hann er 226 cm,“ skrifaði poppstjarnan.
Þá sé hún verulega ósátt við hafa ekki heyrt neitt frá leikmanninum í kjölfar atviksins.
Lögregluyfirvöld í Las Vegas eru sögð vera með málið til rannsóknar og það sé litið alvarlegum augum.
