TikTok-stjarnan Taylor Frankie Paul var handtekin í Salt Lake City í febrúar. DailyMail birti myndband úr búkmyndavél lögreglunnar en þar má sjá Taylor mjög ölvaða og í miklu uppnámi.
Taylor var handtekin fyrir að kasta stól í kærasta sinn, Dakota Mortensen, en stóllinn hæfði einnig fimm ára dóttur hennar.
Taylor er mormóni og vinsæl á TikTok. Hún vakti mikla athygli í fyrra þegar hún greindi frá því á miðlinum að hún og eiginmaður hennar væru að skilja eftir að hún „gekk of langt“ á „soft-swing“ kvöldi. „Soft-swing“ eða „mjúk makaskipti“ er þegar pör skiptast á mökum en stunda ekki samfarir.
Þann 17. febrúar var Taylor handtekin. Í myndbandinu sem DailyMail birtir kemur fram að Taylor hafi orðið brjáluð þegar Dakota neitaði að fara með henni á tónleika á þeim forsendum að hún væri of ölvuð. Þá hafi Taylor „misst vitið“ og kastað stólum í kærasta sinn, einn þeirra fór óvart í höfuðið á fimm ára dóttur hennar.
Eftir að lögreglan mætti á vettvang sagði Taylor að hún hafi „verið svo hrædd að ég pissaði á mig.“
Hún sagði að Dakota hefði ýtt henni fyrst og hún hafi varið sig með því að kasta stólum í hann. Taylor er 27 ára og Dakota 30 ára.
Taylor var í upphafi handtekin fyrir smávæglegar sakir en eftir að Dakota sýndi lögreglu myndband úr síma hans, þar sem Taylor sást kasta stól í dóttur sína, var áhrifavaldurinn ákærður fyrir stórfellda líkamsárás, heimilisofbeldi í viðurvist barns og ofbeldi gegn barni.
Tveimur vikum síðar gaf héraðssaksóknari í Salt Lake sýslu út ákæru á hendur Taylor. Tveir ákæruliðanan varða þriðja stigs heimilisofbeldi í viðurvist barns sem leiddi til áverka.
Ef hún verður fundin sek gæti hún átt yfir höfði sér allt að fimm ára fangelsi. Hún mætir fyrir dóm þann 14. apríl næstkomandi.
Taylor er með rúmlega fjórar milljónir fylgjenda á TikTok. Hún deilir þar daglegu lífi sínu með fylgjendum. Hún á tvö börn með fyrrverandi eiginmanni sínum.
Hún hneykslaði fylgjendur sína síðasta sumar þegar hún sagði að hún og þáverandi eiginmaður hennar, Tate, væru að skilja því hún hafi gengið of langt á „soft-swingin“ viðburði.
Fyrir um hálfu ári síðan byrjaði hún með Dakota Mortensen.
Greint er frá því að Taylor og Dakota séu enn saman og séu að „vinna í sambandinu.“ Hún hefur birt nokkrar færslur á samfélagsmiðlum og sagðist ekki ætla að birta myndir eða myndbönd af börnunum sínum á netinu, en það sé tímabundið ástand. Hún hefur hins vegar ekki tjáð sig um ákæruna opinberlega.
DailyMail fjallar nánar um málið.
