Þorbjörg Marinósdóttir, eða Tobba eins og hún er alltaf kölluð, eigandi Granólabarsins, hugsar lóunni gott til glóðarinnar í bakþönkum Fréttablaðsins í dag.

Eins og þeir vita sem þekkja ljóðið um lóuna þá hefur dálæti á þeim sem vaka og vinna, en skammar þá sem hvíla sig. Þessu er Tobba ekki sammála og segir dugnað vissulega dyggð en það sé hvíldin líka.

„Lóan er komin að kveða burt snjóinn – en ekki virðist hún blessunin ætla að taka með sér yfirvinnublæti okkar Íslendinga.

Af hverju get ég fullorðin manneskjan ekki lagt mig um miðjan dag þegar ég á frí og er örmagna án þess að vakna úrill með samviskubit? Mér líður eins og ég sé að svíkjast um. Aumingi með dregið fyrir um miðjan dag. Það virðist engu skipta að ég hef þennan dag engum öðrum skyldum að gegna en að hvíla mig eftir aðgerð,“ segir Tobba og segir vinkonur sínar hafa hafa sömu sögu að segja. 

„Ein í veikindaleyfi en getur með engu móti lagt sig eftir að hafa komið barnaskaranum út á morgnana nema að upplifa sig sem einskisnýtan aumingja.

Við erum nefnilega alin upp við að vera alltaf að gera eitthvað.

Hvað er dugnaður og metnaður og hvað er áráttukennd vinna, til þess fallin að koma inn samviskubiti yfir að hvíla sig? Vissulega er dugnaður dyggð – en það er hvíld líka.

Við vitum núna að of mikil vinna er ömurð sem rænir fólk heilsu og fjölskyldu en það er ekki hægt að hætta að vinna stanslaust þegar það er búið að forrita þig til yfirvinnu.

Hvernig getur fólk bara slökkt á yfirvinnublætinu? – hvort sem það er þegar það er 67 ára eða komið á vegg vegna vinnu?

Fokking lóan er stanslaust í eyranu.

„Hún hefur sagt mér til syndanna minna, ég sofi of mikið og vinni ekki hót. Hún hefur sagt mér að vaka og vinna og vonglaður taka nú sumrinu mót.“

Fokking lóan.“