„Þessi Ayahuasca serimónía var það stórkostlegasta sem ég hef upplifað á ævinni,“ segir Ásdís Olsen, sem stýrir þættinum Undir yfirborðinu á Hringbraut, um reynslu sína af því að taka inn hugvíkkandi efni. Í þættinum sem sýndur er í kvöld er Ásdísi fylgt eftir þegar hún fer í Ayahuasca athöfn sem haldin var á leynilegum stað í nágrenni Reykjavíkur.

„Ég lofaði því í fyrri seríu að ég ætlaði að prófa sjálf að nota svona vitundarvíkkandi efni og lýsa því hvaða áhrif þau hefðu. Í þessum þætti þá ætla ég að bjóða ykkur með mér í þetta ferðaleg,“ segir Ásdís um þátt kvöldsins.

Hún stalst til að taka upp símann sinn í athöfninni til að taka upp myndband og lýsa því sem hún er að upplifa þar. „Ég finn allar þessar stórkostlegu tilfinningar og ekki bara eins og maður heldur að tilfinningar séu, heldur… ég hef oft talað um kærleika og þjónustu, en nú veit ég hvað það er,“ segir hún á meðan hún er í annarlegu ástandi.

„Vá, ég fann allar þessar stórkostlegu tilfinningar og ekki bara svona eins og maður heldur að tilfinningar séu heldur… úff, æj ég veit ekki hvernig ég á að lýsa þessu, ég fer að gráta.“

Ásdís fékk svo Harald Erlendsson geðlækni til að fara í gegnum þessa reynslu sína og hjálpa sér að vinna úr upplifuninni og nýta hana til gagns.

Þátturinn verður sýndur á Hringbraut í kvöld klukkan 19:30.