Leikkonan og áhrifavaldurinn Kristín Pétursdóttir fer yfir upphaf LXS-gengisins og hvernig þessi sjö manna hópur ólíkra vinkvenna hefði komið til með að vera.
Hún er nýjasti gestur hlaðvarpsins Chess After Dark þar sem hún fer um víðan völl í samræðum við þáttastjórnendurna Leif Þorsteinsson og Birkir Karl Sigurðsson. Hún ræðir um lífið sem áhrifavaldur og leikkona, og deilir skemmtilegum fróðleik um vinsælasta vinkonuhóp landsins.
LXS-dívurnar eru sjö talsins, þær Kristín Pétursdóttir, Sunneva Einarsdóttir, Birgitta Líf Björnsdóttir, Magnea Björn Jónsdóttir, Hildur Sif Hauksdóttir, Ína María Norðfjörð og Ástrós Traustadóttir. Þær eiga það sameiginlegt að tugi þúsunda landsmanna fylgir þeim á Instagram, vilja vita allt um þær og fylgist með hverju skrefi þeirra. Þrátt fyrir að hópurinn hefði fyrst komið saman sumarið 2020 þá tengdust þær sterkum böndum og hafa merkt sig hver annarri til æviloka með húðflúri vinahópsins.
Sjá einnig: Áhrifavaldadrottningar landsins innsigla vináttuna með bleki
Í Chess After Dark fer Kristín yfir upphaf LXS-hópsins. „Við Birgitta höfum verið vinkonur síðan í grunnskóla. Gaurar sem voru að skipuleggja einhverjar ferðir höfðu samband við hana og báðu hana um að setja saman vinkonuhóp og það væri „ekkert verra“ ef þær væru með fylgjendur,“ segir Kristín.
„Birgitta smalar saman og spyr mig ásamt fleiri stelpum hvort við komumst í ferð um helgina. Sumar komust, aðrar ekki, en við enduðum sem þessi sjö manna hópur.“
Sjá einnig: LXS-skvísurnar halda heilög jól
Kristín segir að hún þekkti ekki allar í hópnum á þeim tímapunkti. „Svo bara tengdumst við allar vel í þessari ferð […] Ekkert drama og gekk ógeðslega vel.“
Þær fóru síðan að hittast oftar. „Svo varð þetta bara eitthvað grín. Skírðum spjallið okkar einhverju fyndnu nafni og þetta LXS er semsagt komið úr því. Svo hefur þessi hópur haldið samleið, alveg random hópur en það eru allir með sitt innlegg. Erum allar ólíkar.“
Þú getur horft á þáttinn hér að neðan.
