Guðrún Kristín Ívarsdóttir miðill er framan á forsíðu nýjasta tölublaði Vikunnar. Hún opnar sig um áföll og litríka ævi sína í einlægu viðtali.
Guðrún eignaðist dóttur sína þegar hún var 23 ára. Fæðingin var mjög erfið og voru báðar Guðrún og dóttir hennar í lífshættu. En það var annað sem gerðist í fæðingunni að sögn Guðrúnaar, sýnirnar opnuðust af fullum krafti. Í kjölfarið fór hún til Friðbjargar Óskarsdóttur í Kærleikssetrinu og í Mannræktarskólann. Hún gekk næst í gegnum ákveðin próf hjá Sálarrannsóknarfélagi Íslands og stóðst prófin og hefur verið að vinna þar allar götur síðan.
Sjá einnig: Guðrún Kristín segist fá skilaboð frá látnu fólki – „Ég er ekki með einhvern spuna“
Í viðtalinu segir Guðrún frá því að hún hefur fengið skilaboð um að hún verði 96 ára. Hún rifjar upp lífshættulegt atvik þegar hún var í Taílandi. „Þar keyrði á mig rúta og ég flaug um 30 metra í loft upp. Það hlýtur einhver ástæða að vera fyrir því að ég skuli vera á lífi. Ég á að hjálpa öðru fólki,“ segir hún.
Guðrún nefnir nokkra atburði sem hún hefur spáð fyrir, meðal annars fall flugfélagsins Wow air.
„Ég sá fyrir fall Wow air, ég sá einnig fyrir fjármálaglæpi og glæpaklíkur frá Eystrasaltslöndunum, þar sem glæpir fara harðnandi, meðal annars skotvopn yrðu höfð um hönd og að almenningur myndi krefjast þess að meira fjármagn yrði lagt í löggæsluna. Ég spáði einnig hneyksli í Þjóðkirkjunni 2019 sem varð til þess að margir sögðu sig úr henni. Í síðustu áramótaspá sá ég klofning innan Sjálfstæðisflokksins og að Bjarni Benediktsson færi halloka, þar sem hann hefur misst mikið af trúverðugleika sínum, og ég kom líka inn á Samherjamálið,“ segir hún.
Guðrún segir að það gerist sjaldan að fólk efist um hæfni hennar og hæfileika. Það hefur gerst tvisvar á þeim 20 árum sem hún hefur starfað við þetta að fólk hefur óskað eftir endurgreiðslu.
Þú getur lesið viðtalið við Guðrúnu í nýjasta tölublaði Vikunnar.
