Vilborg Halldórsdóttir leikkona er í skemmtilegu forsíðuviðtali í nýjasta tölublaði Vikunnar sem var að koma út. Hún ræðir um æskuna, ástríðuna fyrir leiklistinni og hjónaband sitt og tónlistarmannsins Helga Björnssonar.

Vilborg og Helgi hafa verið saman í yfir fjóra áratugi. Þau kynntust á balli í Hnífsdal árið 1977 og segir Vilborg að það hafi verið ást við fyrstu sýn.

„Við féllumst einhvern veginn í faðma, dönsuðum síðasta dansinn og síðan voru ljósin kveikt. Þá var ballið búið, en ekki hjá okkur. Við dönsuðum tangó út í hríðina og erum búin að vera saman síðan,“ segir Vilborg í viðtalinu.

Vilborgu og Helga var greinilega ætlað að koma saman. Áður en þau hittust í fyrsta skipti sá Vilborg aftan á Helga, tvisvar.

„Ég var að ganga niður Frakkastíginn þegar ég sé í sýn aftan á háan, grannan, ljóshærðan mann í bláum frakka ganga á undan mér niður brekku einhvers staðar. Svo bara gleymdi ég því en löngu seinna birtist þessi mynd nákvæmlega svona þegar Helgi gekk á undan mér niður bratta brekku á Ísafirði. Þá líkamnaðist myndin sem ég hafði séð mörgum mánuðum áður.“

Nú fjörutíu árum seinna eru þau enn saman og góðir vinir, sem skiptir miklu máli að sögn Vilborgar. Hún segir virðingu og húmor einnig skipta miklu máli. Hún vill þó ekki vera bara þekkt sem „Vilborg hans Helga“ og segist vita hvernig hún á að breyta því. „Það er með því að skapa mín eigin listaverk og ég er með nokkur í farvatninu,“ segir hún.

Þú getur lesið viðtalið við Vilborgu í nýjasta tölublaði Vikunnar.