Indíana Nanna Jóhannsdóttir, einka- og hópþjálfari, lifir og hrærist í öllu því sem snýr að heilnæmum mat og heilsu. Hún á og rekur netþjálfunarfyrirtækið GoMove og heldur úti vinsælli Instagram-síðu þar sem hún birtir uppskriftir og ýmiskonar innblástur til fólks að stuðla að bættri líðan.

Alþekkt er að Íslendingar flykkjast á líkamsræktarstöðvarnar strax á nýju ári – gjörsamlega bugaðir eftir ofgnótt af mat, drykk og sætindum yfir hátíðarnar. Athygli hefur því vakið að Indíana blæs snemma í herlúðra og fer að stað með heilsuáskorun á heldur óvenjulegum tíma – beint ofan í aðventuna.

„Markmiðið með áskoruninni er að hvetja nútímakonuna, sem hefur svo sannarlega mikið að gera, til að taka sér tíma til þess að hugsa um sjálfa sig í öllu amstrinu. Hún á það skilið að bíða ekki með þar til í janúar að huga að heilsunni. Það er er nefnilega alveg jafn mikilvægt í aðdraganda jólanna,“ segir Indíana.

Áskorunin hefst mánudaginn 6. desember og stendur yfir til og með 22. desember en með því að skrá sig þá fá þátttakendur aðgang að lokuðum Facebook-hóp sem Indíana heldur úti í kringum önnur námskeið sín.  „Þær sem taka þátt hafa aðgang alveg til áramóta sem þýðir daglegar uppskriftir, fróðleikur og hvatning frá mér og yfir 150 konum sem eru nú þegar í grúppunni,“ segir Indíana.

Því fer þó fjarri að áskorunin snúist bara um að púla í ræktinni. „Þetta snýst um að gera eitt af þessum þremur atriðum á hverjum degi. Hreyfa sig 30-60 mínútur, elda eða baka eitthvað ljúffengt eða að búa sér til gæðastundir.”

Segja má að sannkallaður jólaandi svífi yfir vötnum varðandi áskorunina því allt skráningargjald þátttakenda mun renna til Barnaspítala Hringsins. „Það má segja að verið sé að slá tvær flugur í einu höggi – huga að heilsunni og gera góðverk í leiðinni. Skráningargjaldið er 4.990 krónur og mun allt renna til þessa góða málaefnis. Viðtökurnar hafa verið afar góðar og ég hef því mjög metnaðarfull markmið varðandi söfnunina og hlakka til þess að greina frá því hver heildarupphæðin verður.“

Hægt er að skrá sig til leiks eða fá meiri upplýsingar með því að senda Indíönu skilaboð á Instgram (@indianajohanns) eða með því að senda tölvupóst á gomove@gomove.is.