Fjölskyldu- og húsdýragarðurinn er kominn í jólabúning og dýrin í garðinum komin í jólaskap. Jólaljós hafa verið sett upp um allan garð og ævintýri líkast að ganga um hann. Hægt verður að kaupa heita súpu, hlýtt kakó og smákökur og svo rölta um og dást að ljósadýrðinni og komast í jólaskap. Útigrillin verða opin og er tilvalið að grilla pylsur eða sykurpúða þegar veður er gott, bara muna að klæða sig vel. Öllum er svo boðið í hringekjuna á kvöldopnunum í desember.

Hefðbundinn opnunartími er alla daga frá klukkan 10 til 17. Frá 2. desember til jóla verður frítt í Ljósadalinn í Fjölskyldugarðinum frá klukkan 16 – 21, frá fimmtudegi til sunnudags. Strax á leiðinni niður að Fjölskyldugarðinum tekur ljósadýrðin á móti gestum því stígurinn frá bílastæðunum niður að hliði garðsins er ljósum prýddur. Kannski verður jólakötturinn á vegi gesta en hann verður kominn á stjá og fylgist vel með umferðinni um garðinn. Aðventan í Ljósadalnum býður upp á eitthvað fyrir alla fjölskylduna og í fallegu umhverfi geta gestir átt skemmtilegan dag og komist í jólaskap í ljósadýrðinni.

Gestir eru hvattir til að taka myndir af stemningunni og birta á samfélagsmiðlum undir myllumerkinu #ljosadalur21. Starfsfólk garðsins velur þrjár athyglisverðustu myndirnar eftir jól og myndasmiðirnir fá að launum árskort í garðinn.

„Ljósadalurinn er griðastaður fyrir fólk til að heimsækja á aðventunni, slappa af og njóta ljósa og tónlistar,“ segir Ingi Thor Jónsson verkefnastjóri viðburða.