Kanye West ætlar berjast fyrir fjölskyldu sinni. Hann gerði það ljóst í ræðu sem hann hélt í gær þar sem hann ræddi um mikilvægi þess að sameina fjölskyldur. E! News greinir frá.
Kanye og Kim Kardashian skildu að borði og sæng í byrjun árs. Þau eiga saman börnin North, Saint, Chicago og Psalm.
Fyrrverandi hjónin hafa verið óvenju mikið í fjölmiðlum upp á síðkastið. Það var greint frá því í byrjun nóvember að Kanye væri kominn með 22 ára kærustu, fyrirsætuna Vinetriu. En það sem er búið að tröllríða fjölmiðlum vestanhafs er nýja ástarsamband Kim og grínistans Pete Davidson.
Kim og Pete hafa látið sjá sig opinberlega núna nokkrum sinnum þar sem þau haldast í hendur og virðast ekki fara leynt með það að þau séu að hittast. Margir velta því hins vegar fyrir sér hvort um svakalega markaðsbrellu sé að ræða.
Sama hvort það er þá er Kanye harðákveðinn að endurheimta fjölskyldu sína.
„Þessi Þakkargjörðarhátíð er tíminn til að endurheimta fjölskyldur. Þetta snýst allt um að endurheimta fjölskyldur. Ég var svo hamingjusamur að vakna í morgun, að æfa og geta svo keyrt heim til mín og hitta eiginkonu mína og börnin mín. Já það er rétt. Ég sagði eiginkonu mína og börnin mín, og ég vil að allir biðji fyrir fjölskyldu minni.“
Kanye West viðurkenndi í ræðunni að hann hefur gert mistök. „Ég hef opinberlega gert hluti sem eru ekki eiginmanni sæmandi. En ég er hér til að breyta því,“ segir hann.
„Ég er að reyna að gera allt sem ég get til að laga aðstæður.“
Hann útskýrði að hann væri að reyna að tjá sig eins „rólega“ og „skynsamlega“ og hann gæti og að honum þykir mikilvægt að tala um þetta svo fólk skilji mikilvægi þess að sameina fjölskyldur.
„Ég er að segja þetta því ef óvinurinn getur aðskilið Kimye [innsk. blaðamanns: paranafn Kim og Kanye] þá mun milljónum fjölskyldna finnast það í lagi að skilja. Þegar Guð […] kemur Kimye aftur saman, þá sjá milljónir fjölskyldna það og að þær geti komist yfir erfiðleikana.“