Björn Ingi Hrafnsson, ritstjóri Viljans, hefur undanfarið verið á andlegu og líkamlegu ferðalagi þar sem hann breytti um lífsstíl og tókst þannig að losna undan of háum blóðþrýsting og streitu. Hann fer stuttlega yfir þær breytingar sem hafa orðið á lífi hans í pistli á Facebook og boðar ítarlegri umfjöllun í væntanlegu hlaðvarpi hans sem mun kallast Björn Ingi á Viljanum.

„Örsaga úr hversdeginum #197: „Ef ég get þetta þá geta það allir”. Það varð margt til þess að ég tók heilsuna í gegn fyrir nokkrum árum. Ekki var hægt að bjóða lítilli dóttur minni upp á feitan pabba sem gæti ekki leikið við hana eða lifað með henni fram á fullorðinsár.“

Björn Ingi segir ferðalagið krefjandi fyrir mann sem hafi lengi glímt við kvilla á borð við háan blóðþrýsting og streitu. Það sé því ákveðið kraftaverk að sjá þann árangur sem hann hefur náð.

„Fyrir þann sem glímir of lengi við aukakíló, aukakvilla á borð við háan blóðþrýsting og of mikla streitu, er kraftaverk að sjá bumbuna hverfa og þróa þess í stað með sér kviðvöðva, geta farið án aðstoðar í upphýfingar, gert erfiðari tegundina af armbeygjum, fara í sjóböð, læra furðustellingar í jóga og hlaupa lengri vegalengdir eins og ekkert sé. Geta hætt á blóðþrýstingslyfjum og gerbreyta um lífsstíl.“

Hann segir að andlega heilsan skipti einnig miklu máli og þar hafi áfengisbindindið hjálpað mikið.

„Andlega heilsan er líka allt önnur og áfengisbindindið skiptir þar miklu máli. Í nýju hlaðvarpi (Björn Ingi á Viljanum) mun ég segja frá þessu andlega og líkamlega ferðalagi mínu og vonandi líta einhverjir á það sem hvatningu til góðra verka. Það er nefnilega allt hægt og aldrei of seint að byrja.“