Móðir að nafni Nicole hefur orðið fengið að heyra það frá öðrum foreldrum eftir að hún sagðist reykja gras á meðan börnin hennar eru heima. Nicole, sem heldur uppi vinsælli Instagram-síðu, segist ekki sjá vandamál við reykingarnar og að þær komi öðrum foreldrum ekki við.

„Hvernig þú ákveður að slaka á eftir að börnin eru farin að sofa kemur engum við nema þér,“ segir hún í færslu sem hún birti á Instagram-síðu sinni. „Það mikilvæga er að þú slakir á. Ef áfengi er þitt meðal, gerðu það þá, en ekki ráðast á mig fyrir að gera það sem ég geri.“

Nicole segir þá að það séu ekki nógu margar mæður sem styðji kannabis notkun og að þær sem geri það séu dæmdar fyrir það. „Getum við sammælst um að hætta að skamma fólk fyrir að nota eitthvað sem hefur verið lögleitt í hálfu landinu,“ segir Nicole en hún býr í Bandaríkjunum en gras hefur verið lögleitt í stórum hluta landsins.

„Hvort sem það er notað til afþreyingar eða af læknisfræðilegum ástæðum þá styð ég það,“ segir hún og nokkrir fylgjendur taka undir með henni í athugasemdunum.

„Ég væri miklu frekar til að rekast á einhvern sem er skakkur og er að flissa heldur en einhvern sem er fullur og árásargjarn,“ segir til að mynda í einni athugasemdinni. „Ég vil frekar vera með kannabis-mömmunum heldur en vín-mömmunum,“ segir í annarri athugasemd.