Tilvonandi brúður aflýsti brúðkaupinu þegar hún komst að því að unnustinn hefði haldið framhjá. Hún ákvað samt að aflýsa ekki öllum pakkanum og nýtti sér ljósmyndarann sem átti að taka myndir af brúðhjónunum á stóra deginum.

Meredith Mata, 27 ára, varð eyðilögð þegar hún komst að því að kærasti sinn til fjögurra ára hefði haldið framhjá sér. Parið ætlaði að gifta sig og var búið að skipuleggja brúðkaupsdaginn, leigja sal og bóka ljósmyndara.

Eins og samband þeirra fór brúðkaupsdagurinn í ruslið þegar Meredith komst að því að unnustinn hefði verið henni ótrúr.

Hún ákvað að afbóka ekki ljósmyndarann heldur fara í myndatöku fyrir sig sjálfa. Í samtali við News.au segir hún það hafa snúist um að finna „styrk og fegurð“ í aðstæðum sem voru erfiðar.

„Eitthvað eins og þetta gefur konum tækifæri til að klæða sig upp og gera eitthvað skemmtilegt frekar en að vera í eymd og volæði,“ segir hún.

„Ég hef séð skilnaðarpartý og myndatöku þar sem brúður eyðileggur brúðkaupskjólinn og mér hefur alltaf þótt það töff en datt aldrei í hug að ég myndi vera í þessum aðstæðum.“

Meredith viðurkennir að hún vissulega vildi að myndatakan væri valdeflandi en ákvað að eyðileggja ekki brúðkaupskjólinn sem kostaði rúmlega 500 þúsund krónur. Hún keypti annan kjól, sem hana langaði upphaflega í en unnustinn sagði að væri of „djarfur.“ Hann kostaði 36 þúsund krónur.

„Ég var ekki mjög sorgmædd þegar ég fór í brúðarkjólinn. Ég var bara spennt og smá stressuð, en þetta var ótrúlega valdeflandi,“ segir hún. „Mér fannst ég falleg og algjör töffari.“

Vinkonur Meredith studdu hana í einu og öllu og hjálpuðu henni með myndatökuna. Sjáðu myndirnar hér að neðan.