Guðbjörg Elísa, eða Gugga Lísa eins og hún kallar sig, hefur gefið út tónlistarmyndband við nýja lagið sitt Lífið Er Núna. Lagið og myndbandið er tileinkað
móður Guggu Lísu, henni Kristínu Snæfells Arnþórsdóttur, sem er að berjast við krabbamein og Krafti, stuðningsfélagi fyrir ungt fólk sem greinst hefur með krabbamein og aðstandendur.
Gugga Lísa frumflutti lagið sjálft í beinni í sjónvarpi Símans þann 4. febrúar ásamt Páli Óskari í styrktarútsendingu Krafts sem bar einmitt nafnið Lífið er núna.
Guðbjörg hefur samið og sungið frá barnsárum en það er mikil tónlistarmenning í hennar fjölskyldu. Tónlist er hennar stærsta ástríða og nýtur hún einna helst að syngja lofgjörð, sálartónlist, ástarlög og tónlist með fallegum boðskap.
Tónlistin hefur hjálpað Guðbjörgu í gegnum hennar stærstu áföll en missti hún bróður sinn úr hvítblæði. Hún var þá þriggja en hann 11 ára. Einnig missti Guðbjörg ömmu sína úr krabbameini og eins og fyrr greinir er móðir hennar nú að berjast við krabbamein. Því tileinkar Guðbjörg þeim lagið Lífið er núna ásamt öllum þeim sem eru og hafa barist við krabbamein og aðstandendum.
Nú hefur lagið verið gefið út á Spotify og myndbandið er komið á Youtube. Álfrún Kolbrúnardóttir, skrifaði handritið ásamt því að leikstýra og framleiða myndbandið.
Myndbandið má sjá hér að neðan.