Guðný María Arnþórsdóttir, einnig þekkt sem páskastjarnan, hefur sent frá sér glænýtt lag. Lagið er tímamótaverk fyrir Guðnýju en hún samdi það fyrir miðpróf í tónfræði og segist hafa lagt mikla vinnu í það. Í laginu má heyra hana spila á fiðlu en þetta er í fyrsta sinn sem hún notast við hana í verkum sínum. Að vana er lagið, textinn og myndbandagerð, allt úr smiðju Guðnýjar.

„Textinn er um lífið mitt, sem ég vona auðvitað alltaf að fari að verða farsælla. Ég held að ég nái þarna betri tjáningu og spákonuna þekkja flest ykkar. Jú, og auðvitað mun þetta allt lagast og betri tímar framundan,“ segir Guðný í samtali við DV.

Lagið ber nafnið Framtíðarsýn og með aðalhlutverk í tónlistarmyndbandinu fer Guðný ásamt Siggu Kling, sem er þekkt spákona. Hægt er að hlusta á lagið í heild sinni, sem og sjá tónlistarmyndbandið, hér fyrir neðan.