Á samfélagsmiðlinum Reddit hefur íslensk jólahefð vakið mikla athygli. Íslendingar á samfélagsmiðlinum eru þó ekki allir sammála um að um hefð sé að ræða.
Umræðan hófst er færslu var deilt inn á svæði fyrir áhugaverða hluti á Reddit en tæpar þrjár milljónir manna fylgjast með svæðinu. Í færslunni sem um ræðir var talað um jólabókaflóðið. „Á Íslandi gefur fólk bækur á aðfangadagskvöldi. Síðan eyðirðu kvöldinu í rúminu að lesa bækurnar og borða súkkulaði,“ segir í færslunni sem hefur fengið mikla athygli. Þá er einnig sagt að flestar bækur séu seldar frá september og fram í nóvember þar sem fólk er að undirbúa hátíðirnar.
Á íslenska svæðinu á Reddit eru ekki allir sammála um ágæti færslunnar sem um ræðir. „Kanarnir að ljúga meira og meira,“ segir einn Íslendingur sem deilir upphaflegu færslunni. „Þetta er samt alveg rétt? Held ég hafi upplifað tvenn jól sem ég fékk enga bækur í jólagjöf og það var alveg glatað,“ segir einn Íslendingur sem er ósammála um að um lygi sé að ræða.
„Þetta er bara hárrétt, allavega á mínu heimili. Súkkulaði og allt,“ segir annar. „Það má vel vera að þetta sé frekar ýkt en samt… er þetta svo slæmt? Það eru til verri mýtur um landið og verri sannleikar. Þetta hljómar nú frekar milt og krúttlegt,“ segir síðan enn annar.
