„Við viljum rísa aftur og láta gott af okkur leiða,“ segir Kristín Bára Haraldsdóttir sem búsett hefur verið í Kambódíu undanfarin misseri þar sem hún rekur bakarí og heldur úti öflugu starfi í þágu samfélagsins. Húsnæði bakarísins brann til kaldra kola þann 11.júní síðastliðinn. Á vef Gofundme hefur verið hrundið af stað söfnun til að endureisa starfsemina.
Kristín Bára og unnusti hennar Adrian Cowen fluttust til Kambódíu árið 2016 og eru í dag búsett í Sihanoukville í suðurhluta landsins. Þar reka þau bakaríið Bake & Bake ásamt heimamönnum en stór hluti starfseminnar felst í góðgerðarstarfi í þágu samfélagsins. Þrír bakarar hafa hingað til verið fastráðnir en bakaríið framleiðir smákökur sem seldar eru í verslunum, gistihúsum og hótelum víða um landið. Þá hafa fjölmargir sjálfboðaliðar séð um að koma bakkelsinu til skóla þar sem ungir nemendur búa við sárafátækt. Parið hefur unnið að því að koma á fót sjálfbæru óhagnaðardrifnu félagi sem síðan gefur framleiðsluna til fátækra barna, í skóla og á munaðarleysingjahæli. Þau vinna nú að verkefni sem felst í að útbúa vítamín- og próteinstykki fyrir bágstödd börn á svæðinu.
Fréttamiðlar í Kambódíu greindu frá brunanum fyrr í mánuðinum en talið er að kviknað hafi í út frá rafmagni. Húsnæðið er nú gjöreyðilagt en Kristín Bára segir engan skaða hafa orðið á fólki.
„Við höfum alltaf verið mjög virk í góðgerðarmálum og þessi tragedía hefur stoppað okkur í að hjálpa öðrum. Við vitum að það eru erfiðir tímar hjá flestum en ástandið hér er 100 prósent verra þar sem fjölda uppsagnir gera það að verkum að fjölmargir hafa ekki efni á að fæða börnin þín. Þörfin er brýn,“ segir Kristín Bára í samtali við DV.
Með söfnuninni á vef Gofundme vonast þau til að hægt verði að endureisa starfsemina og ráða starfsfólkið til baka en líkt og Kristín Bára bendir á hefur bakaríið skapað störf fyrir fjölmargar fjölskyldur á svæðinu undanfarin misseri. Þá hafa þau hýst yfir 200 sjálfboðaliða á vegum Workaway og veitt þeim starfsþjálfun. Sjálfboðaliðarnir hafa séð um að koma bakkelsinu til fátækra fjölskyldna í Otres Village og í skólann á svæðinu.
