Netröllið og gervimaðurinn frægi Baldur Muller er horfinn af Facebook. Frá þessu greinir Margrét Friðriksdóttir í Facebook-hópnum Stjórnmálaspjallið.

Baldur Muller vakti mikla athygli hér á landi vegna mjög svo umdeildra skoðanna sinna, sem hann var duglegur að miðla á Facebook-hópum líkt og á Stjórnmálaspjallinu.

Samkvæmt skrifum Baldurs leit hann á fóstureyðingar sem morð, auk þess taldi hann innflytjendur frá mið-austurlöndum ekki eiga að fá tækifæri í Evrópu. Hann talaði einnig mikið um trúmál og umskurð drengja.

Margrét Friðriksdóttir sagði að Baldur hefði aldrei verið dónalegur í skrifum sínum, heldur alltaf verið málefnalegur.

„Ég sá hann aldrei dónalegan eða vera með persónuníð gegn fólki sem voru ekki á hans línu heldur ávalt málefnalegur og kurteis blessaður.“

Ekki voru allir sammála Margréti, þar á meðal var kynjafræðingurinn og aktiívistinn Ugla Stefanía Kristjönudóttir Jónsdóttir.

„Baldur er ekki bara oftast dónalegur og ónærgætinn í sinni framsetningu, heldur líka fordómafullur, hrokafullur og illa innrættur. Annað hvort er hann að trölla hérna viljandi með öfgafullum skoðunum sem hann trúir ekki endilega sjálfur, eða þá að hann er það óheiðarlegur að geta ekki komið fram undir eigin nafni. Ég veit satt að segja ekki hvort er verra.“

Margrét gagnrýndi þó Baldur fyrir að koma ekki fram undir eigin nafni og birta mynd af sér, en líkt og frægt er orðið þá notaði aðgangur Baldurs mynd af skeggjuðum Úkraníumanni.

Margar getgátur voru á lofti varðandi það hver væri á bakvið aðgang Baldurs. Ein vinsælasta kenningin var að guðfræðingurinn Jón Valur Jensson hafi verið á bakvið aðganginn.