Lengi hefur verið deilt um réttmæti klámnotkunar en klám hefur aldrei verið eins aðgengilegt og á seinni árum eftir tilkomu internetsins. Á umræðuvefnum kialo.com, þar sem ýmis siðferðisleg álitaefni og mannlífstengd málefni eru krufin, má finna áhugaverða samantekt á umræðum um siðferðislegt réttmæti eða óréttmæti þess að horfa á klám.

Við mælingar á atkvæðum og ummælum kemst vefurinn að því að samkvæmt þátttakendum sé það siðferðislega réttmætt að horfa á klám. Niðurstaðan er þó engan veginn einhlít og fremur mjótt á munum.

Hér að neðan má lesa helstu röksemdirnar með og gegn klámnotkun:

Mikið af klámi er unnið á siðlegum grunni og á öruggan hátt. Það er vel hægt að velja sér klám sem stenst siðferðislegar kröfur

Það er farið illa með fólk sem vinnur í klámiðnaði og það oft haft að féþúfu.

Tengsl fjölmiðlaneyslu við siðferði eru óljós. Það er erfitt og jafnvel ómögulegt að sjá tengsl á milli þess að horfa á eitthvað og þess að bera persónulega ábyrgð eða sök á því sem horft er á.

Að horfa á klám styður við vændi, kynferðislega nauðung og mansal.

Klám er gert til að kalla fram kynferðislega örvun, veita afþreyingu og jafnvel flótta frá raunveruleikanum. Svo lengi sem sá sem horfir er fullorðinn sem veit að það sem á sér stað á skjánum er ólíkt raunveruleikanum, þá er ekkert siðferðislega rangt við áhorfið.

Klám er skaðlegt fyrir náin sambönd.

Sjálfsfróun er eðlileg og gagnleg. Klám er gott hjálpartæki við sjálfsfróun.

Fólk getur orðið háð klámi og það er vandamál

Klám er hægt að nýta til að bæta kynlíf para

Þeim tíma sem fer í að horfa á klám væri betur varið í að hámarka raunverulega vellíðan sína.

Klám veitir aðgang að kynferðislegu blæti og kynlífsvenjum sem eru ekki aðgengilegar með öðrum hætti.

Að horfa á klám er skaðlegt fyrir viðkomandi einstakling.