Rapparinn Floni heldur tónleika í Austurbæ föstudaginn 15. Febrúar í tilefni útgáfunnar á plötunni Floni 2.

Floni kemur fram ásamt stórskotaliði íslensku tónlistarsenunnar og verður ekkert til sparað.

Tvennir tónleikar fara fram sama kvöldið, fyrir 14-17 ára verður kl. 18.30 og svo fyrir 18 ára og eldri kl. 22. 00.

Floni 2 kom út 31. janúar á streymisveitum Spotify og hefur nú þegar náð yfir 800 þúsund spilunum. Platan var tekin upp í 101derland hljóðverinu í sumar og fylgir eftir hans fyrstu plötu í fullri lengd.

Floni skaust upp á stjörnuhiminn í íslenska rappheiminum með útgáfu fyrstu plötu sinnar Floni þar sem hann blandaði saman mjúkum R&B og kraftmiklum trapp tónum.
Með þessa óvenjulegu samsetningu í bakgrunni hreif þessi tvítugi rappari fólk með sér og hefur tónlist hans fengið yfir 3 milljón spilanir á Spotify.