Bandaríski leikarinn Kevin Spacey hefur lítið verið í sviðsljósinu á undanförnum árum eftir að hafa verið sakaður um fjölda kynferðisbrota. Í kjölfar þessara ásakana var hann rekinn úr sjónvarpsþáttunum House of Cards og var sjötta og síðasta þáttaröðin í miklu uppnámi á tímabili. Það vakti því mikla athygli þegar hann gaf út myndband á jóladag í fyrra sem karakterinn Frank Underwood úr þáttunum vinsælu.
„Ég ætla svo sannarlega ekki að gjalda einhvers sem ég gerði ekki,“ sagði Spacey í myndbandinu sem setti netheima á hliðina.
Nú, í tilefni jóladags, hefur Spacey gefið út aðra kveðju í gervi Underwoods þar sem hann segist ekki hafa staðist mátið að óska fólki gleðilegra jóla.
„Í ljósi þess að árið 2020 er handan við hornið vil ég stuðla að meiri jákvæðni í þessum heimi,” segir Spacey í myndbandinu og heldur áfram. „Ég veit hvað þið eruð að hugsa; er honum alvara?
Mér er dauðans alvara.
Næst þegar einhver gerir eitthvað sem ykkur mislíkar, getið þið ráðist á viðkomandi, eða haldið skotvopnunum aftur og gert hið óvenjulega. Þið getið drepið með góðmennskunni.”
