Tónlistarmaðurinn Ásgeir Trausti og fegurðardrottningin Hugrún Birta Egilsdóttir eru nýtt par. Hugrún birtir fallega mynd af skötuhjúunum á Instagram þar sem hún opinberar ráðahaginn, en myndin er tekin í ferð parsins út í Viðey.

https://www.instagram.com/p/Bz8KZ9KA857/

Ásgeir þarf vart að kynna en hann stimplaði sig rækilega inn í íslenska tónlistarsenu árið 2012 þegar að fyrsta plata hans, Dýrð í dauðaþögn, kom út. Ári síðar kom platan út á ensku og þá var ekki aftur snúið. Síðan þá hefur Ásgeir ferðast um heiminn og haldið tónleika fyrir dygga aðdáendur sem telja nú rúmlega 150 þúsund á Facebook og rúmlega 33 þúsund á Instagram.

Hugrún hefur einnig gert garðinn frægan, þó á öðrum vettvangi en nýi kærastinn. Hún tók þátt í Ungfrú Íslandi árið 2015 og í ár er hún meðal keppenda í Miss Universe Iceland. Hún á ekki langt að sækja hæfileikana þar sem hún er systir Ingbjargar Egilsdóttur sem varð í öðru sæti í Ungfrú Íslands árið 2008 og fulltrúi Íslands í keppninni Ungfrú heimur árið 2009. Þá var amma hennar fegurðardrottning Reykjavíkur árið 1959.