„Ég sé eftir því að hafa unnið undir þínu nafni.“
Þetta skrifar atvinnudansarinn Emma Portner í langri færslu sem birtist á Instagram-aðgangi hennar. Þarna vísar hún í söngvarann Justin Bieber og rifjar upp erfiða minningu þegar hún gegndi hlutverki danshöfundar á tónleikaferðalaginu hans, Purpose World Tour, árið 2016. Má geta þess að þetta er sama tónleikaferðalag og tilheyrði Íslandsheimsókn söngvarans á sínum tíma.
Portner vill meina að Bieber hafi verið með ósmekklegt viðhorf í garð kvenna á þessum tíma og sýndi það sig í framkomu hans við dansarana sína. Í færslunni talar hún um að hann hafi sýnt margs konar merki um einelti og niðurrif, auk þess að hún hafi „varla fengið greitt lágmarkslaun“ fyrir gríðarlega langa vinnudaga.
„Ég gaf þér minn tíma, líkama, mína hugmyndavinnu og mikla erfiðisvinnu. Tvisvar sinnum. Allt var þetta fyrir tónleikaferðalag sem skilaði þér inn milljónum á meðan ég græddi ekki neitt. Núll. Ég átti ekki efni á því að borða og hvernig þú kemur fram við konur er hreinn viðbjóður,“ skrifar hún.
Portner er gift leikkonunni Ellen Page og mjög opinská með samkynhneigð sína, en hún tekur fram að henni þyki það hreint móðgandi að Bieber styðji ekki LGBTQ-samfélagið. Söngvarinn er sagður vera hlynntur Biblíunni, sem að sögn margra samþykkir ekki samkynhneigt fólk. Þá bætir Portner við:
„Þú helgar þinni trú gagnvart kirkju sem samþykkir ekki LGBTQ+ fólk og þú ákveður að ráða opinskáa lesbíu til að hanna dansspor fyrir þig. Hvað finnst þér um þetta? Lesbía að HJÁLPA ÞÉR, fyrir skammarlega peningaupphæð, og síðan mætir þú til kirkju sem fordæmir tilvist mína?“
Portner hvetur þá netverja til þess að fylgjast grannt með Bieber með svipuðum hætti og tónlistarmanninum Chris Brown, en ofbeldis- og kynferðisbrot hans gegn konum er víða þekkt. Bieber hefur sjálfur komið Brown opinberlega til varnar og sagt að brotin skyggi fullmikið á hæfileika hans, að þurfi að endurmeta stöðuna í tilfelli Brown.
Í samhengi trúarinnar segir Portner að Bieber eigi ekki að láta hvítan, gagnkynhneigðan prest lita viðhorf hans gagnvart öðru fólki.
„Ég vona innilega að þú leitir þér upplýsinga utan þessarar biblíu þinnar. Þú hefur ótrúlega mikið vald. Hættu að lítillækka konur!“
Sjá má brot úr færslunni að neðan.
