Ný stikla fyrir Frozen 2 er ansi drungaleg, en í upphafi hennar sést ísdrottningin Elsa rölta um svarta fjöru sem minnir um margt á Reynisfjöru við Vík. Athygli er vakin á þessu í Facebook-hópnum Bakland ferðaþjónustunnar, en upphafsmaður þráðarins segir að stiklunni fylgi ákveðið tækifæri á landkynningu í Bandaríkjunum.

Í stiklunni hleypur Elsa út í sjóinn og reynir að sigra öldurnar, en það er einmitt það sem ferðamenn sem heimsækja Reynisfjöru mega alls ekki gera. Öldurnar eru svo óútreiknanlegar og hættulegar að það hefur komið fyrir að brimið hefur dregið fólk út af ströndinni og það drukknað. Því eru ekki allir sammála í hópnum um að landkynning sé af hinu góða.

„Þetta viljum við einmitt alls ekki tengja við íslenskar fjörur – ekki viljum við að ferðamenn fari að sviðsetja þetta atriði í Reynisfjöru t.d.,“ skrifar einn meðlimur hópsins og annar tekur í sama streng.

„Það væri gott að benda fólki á að ekki allir geti gengið á vatni og þess vegna brýnt að halda sig í hæfilegri fjarlægð frá sjónum þegar stórar öldur skella á fjörunni.“

Stilkuna má horfa á hér fyrir neðan og dæmi nú hver fyrir sig hvort landkynningin er góð eður ei.