Mary Suzanne Crockett og dætur hennar, Grace og Lily, komu til Íslands í desember. Ástæðan fyrir Íslandsheimsókninni voru fréttir um tíðni þungunarrofs hér á landi á fóstrum sem greinast með Downs-heilkenni, en Lily, sem er tvítug og elsta barn Mary , er með Downs.

Mæðgurnar sögðu í viðtali við Fréttablaðið 5. janúar, að þær hafi hreinlega brotnað niður þegar þær heyrðu þessar fréttir, en fullyrt var í umræddum fréttum að fóstrum með Downs væri eytt í næstum hundrað prósentum tilvika hér á landi. Fréttirnar báru fyrirsagnir á borð við „Landið þar sem Downs er að hverfa“ og fóru sem eldur í sinu um heimsbyggðina.

Upphaflega stóð til að Lily kæmi hingað með klappstýruhópi sínum, en það breyttist þegar WOW air hætti beinu flugi til heimaborgar þeirra, St. Louis. Þær mæðgur ákváðu hins vegar að ferðast þrjár til Íslands.

„Við komum til Íslands til þess að sýna að Downs- heilkennið er ekki alslæmt,“ segir Mary. „Lily er með greiningu, ekki skilgreiningu.“

Þær mæðgur gerðu víðreist meðan á Íslandsdvölinni stóð, líkt og sjá má í myndbandinu. Þær fóru í heimsókn á Landspítalann, þar sem Helga Sól Ólafsdóttir félagsráðgjafi á kvennadeild útskýrði fyrir þeim að fréttirnar væru rangar og hefðu verið tekar úr samhengi. Einnig fóru þær í viðtal við Fréttablaðið og í heimsókn til Sólheima.

Auk þess skoðuðu þær hefðbundna ferðamannastaði líkt og Bláa lónið, Gullfoss, Hallgrímskirkju og fleiri.