Íþróttafélagið Gerpla var stofnað árið 1971 og er stærsta og eitt sigursælasta fimleikafélag landsins. Starfsemi Gerplu fór fram að Skemmuvegi í Kópavogi til ársins 2005 er félagið fluttist í nýtt húsnæði að Versölum þar sem starfsemin er í dag. Nýr og merkur áfangi varð í húsnæðismálum Gerplu fyrr í þessum mánuði er félagið opnaði nýja æfingaaðstöðu í Vatnsendaskóla sem er sérsniðin að hópfimleikum. Íþróttakennsla Vatnsendaskóla fer jafnframt fram í þessu húsnæði en þetta er viðbót við aðstöðu Gerplu í Versölum.
Gerpla býður upp á fjölbreytt sumarnámskeið fyrir aldurshópinn 6–10 ára (fædd 2008–2012) í allt sumar þar sem lögð er áhersla á fimleika, sund og aðrar íþróttir ásamt útiveru.
Sumarnámskeiðið Fimleika- og íþróttafjör er vinsælt og mjög vel sótt námskeið en námskeið sumarsins eru nú 11 í stað 8 áður vegna mikillar aðsóknar. Kennt verður á tveimur stöðum, í Gerplu Versölum og í nýju húsnæði Gerplu í Vatnsendaskóla. Þá verða útisvæði í Kópavogi nýtt vel undir námskeiðið auk þess sem eitthvað verður farið út úr bæjarfélaginu til æfinga og leikja. Góðviðrisdagar verða nýttir til hins ýtrasta, farið út með fimleikaáhöld og æft úti.
Á námskeiðunum er skipulögð dagskrá frá klukkan níu á morgnana til kl. 16. Boðið er upp á gæslu án aukakostnaðar frá kl. 8.00–9.00 og frá kl. 16.00–17.00.
Verð fyrir fjögurra daga námskeið er 12.720 kr. Fimm daga námskeið kostar 15.900 kr. Veittur er 20% systkinaafsláttur. Athugið að fjöldi barna á hverju námskeiði verður takmarkaður og ef lágmarksfjöldi næst ekki á námskeið gæti þurft að sameina námskeiðin á einn stað.
Nánari upplýsingar er að finna á vefsíðunni gerpla.is. Skráning fer fram á vefsvæðinu gerpla.felog.is
Tímatafla:
Námskeið 1: 5. júní–8. júní (4 dagar)
Versalir
Námskeið 2: 11. júní–15. júní
Versalir og Vatnsendi
Námskeið 3: 18. júní–22. júní
Versalir og Vatnsendi
Námskeið 4: 25. júní–29. júní
Versalir og Vatnsendi
Námskeið 5: 2. júlí–6. júlí
Versalir
Námskeið 6: 9. júlí—13. júlí
Versalir
Námskeið 7: 16. júlí—20. júlí
Versalir
Námskeið 8: 23.júlí—27. júlí
Versalir og Vatnsendi
Námskeið 9: 30. júlí–3. ágúst
Versalir og Vatnsendi
Námskeið 10: 7. ágúst–10. ágúst (4 dagar)
Versalir og Vatnsendi
Námskeið 11: 13. ágúst–16. ágúst (4 dagar)
Versalir og Vatnsendi
