Orðið á götunni er að húsnæðisskorturinn sé orðinn svo alvarlegur, að jafnvel formenn stjórnmálaflokka séu farnir að finna fyrir honum á eigin skinni. Húsnæðis- og leiguverð er í hæstu hæðum, en ein helsta ástæðan er skortur á íbúðum, en Dagur B. Eggertsson lofaði að byggja heilan helling af þeim fyrir sveitastjórnarkosningarnar árið 2014, en heimturnar reyndust dropi í hafið. Dagur og aðrir stjórnmálamenn keppast nú um að lofa betri búsetuskilyrðum fyrir unga sem aldna, meðan sumir flokksformenn á Alþingi þurfa að hýrast í 120 fermetra öryrkjaíbúð á góðum kjörum, þrátt fyrir að vera yfir tekjuviðmiðum. Hér er verið að tala um Ingu Sæland, formann Flokks fólksins, en til að gæta allrar sanngirni, samdi Inga um að greiða tvöfalda leigu meðan hún væri á þingi, eftir að fréttin um búsetuskilyrði hennar birtist.

Húsnæðisskorturinn nær þó ekki aðeins til búsetuhúsnæðis. Orðið á götunni er að nú standi Inga frammi fyrir húsnæðisvanda af annarri gerð. Flokkur fólksins er með höfuðstöðvar sínar í Hamraborg í Kópavogi, en leitar nú logandi ljósi að skrifstofuhúsnæði í Reykjavík, til að hýsa kosningaskrifstofu sína fyrir komandi borgarstjórnarkosningar. Þarf skrifstofan að vera sæmilega stór, þar sem framboðið mælist með 3.6 prósenta fylgi og nær inn manni samkvæmt síðustu könnun.