Mikil óvissa einkennir ástandið í Framsóknarflokknum varðandi val á nýjum formanni sem fram fer á flokksþingi eftir tæpan mánuð. Línur eru ekki enn teknar að skýrast varðandi nýjan formann.
Margir sýndu því áhuga að fylkja sér um Willum Þór Þórsson en hann mun nú hafa afþakkað stuðninginn. Willum tók við stöðu forseta ÍSÍ á síðasta ári eftir yfirburðakosningu. Hann telur ekki að það gangi upp að fara út á hinn pólitísk vígvöll við þær aðstæður og hann vill ekki yfirgefa ÍSÍ svo skömmu eftir fína kosningu þar. Lilja Alfreðsdóttir, varaformaður Framsóknar, hefur ítrekað verið orðuð við formannsframboð í flokknum en talið er að áhugi flokksmanna á henni hafi mjög dvínað, meira að segja í Skagafirði þar sem talið var að hún ætti vísan stuðning. Flokkurinn á ekki margra kosta völ við þessar aðstæður. Ásmundur Einar Daðason er hættur í stjórnmálum, Einar Þorsteinsson spilaði borgarstjórastólnum frá sér þegar hann plottaði yfir sig í Reykjavíkurborg og þingflokkur Framsóknar er fámennur og fátæklegur.
Orðið á götunni er að innan Framsóknar hafi einhverjir verið farnir að óttast að ekki tækist að ná samstöðu um þokkalegan formann á landsfundinum í febrúar og að Sigurður Ingi Jóhannsson yrði einfaldlega fenginn til að sitja áfram sem formaður. Við þær aðstæður var Finnur Ingólfsson, fyrrum ráðherra og varaformaður flokksins, fenginn til að leiða leitina að nýjum formanni Framsóknar. Þó að Finnur hafi fyrir löngu horfið af vettvangi stjórnmálanna er hann enn sterkur maður að tjaldabaki í Framsókn. Nú er horft til þess að hann greiði úr þeim vandræðagangi sem er tekinn að myndast og komi með lausn á forystukreppunni í flokknum. Hver sú lausn gæti orðið er erfitt að segja til um á þessari stundu. En þó munu allir kostir þykja betri en sá að Sigurður Ingi sitji bara áfram. Er ekki bara best að kjósa Sigurð Inga áfram – yrði ekki sigurstranglegt slagorð!
Ingibjörg Isaksen, þingmaður flokksins í Norðaustur kjördæmi, er sögð hafa mikinn áhuga á að taka við formennsku í flokknum. Hún er fyrrum bæjarfulltrúi Framsóknar á Akureyri og tveir af fimm þingmönnum Framsóknar koma úr kjördæmi hennar. Ingibjörg er hluti af nokkuð öflugri flokksklíku fyrir norðan sem hefur mikil áhrif í flokknum þar. Hún þykir hins vegar ekki hafa sýnt mikla forystuhæfileika frá því hún tók sæti á Alþingi árið 2021 en hún gegnir nú stöðu formanns þingflokks Framsóknar.
Orðið á götunni er að Sigurður Ingi Jóhannsson geti helst hugsað sér Ingibjörgu sem eftirmann sinn. Hún virðist ætla að veðja á að fráfarandi formaður verði bandamaður hennar. Til marks um það er bent á að Ingibjörg birtir á heimasíðu sinni grein sem framkvæmdastjóri Framsóknar skrifaði um Sigurð Inga og birti á Vísi en þar er fráfarandi formaður hafinn upp til skýjanna sem mikilmenni og honum líkt við fyrrum formenn flokksins og talinn upp með Eysteini Jónssyni, Ólafi Jóhannessyni, Steingrími Hermannssyni og Halldóri Ásgrímssyni. Þetta þykir býsna vandræðalegt miðað við þá stöðu sem Framsókn er komin í undir forystu Sigurðar Inga sem skilar flokknum með minnsta fylgi í hundrað ár í valdalausri og misheppnaðri stjórnarandstöðu. Oflof er háð en þannig virðist Ingibjörg ekki hugsa endurbirtingu greinar framkvæmdastjóra flokksins.
Orðið á götunni er að óvíst sé að Finnur líti á Ingibjörgu Isaksen sem æskilegan formann Framsóknar, þó að það sé ekki talið útilokað. Þeir sem þekkja Finn vita að hann hefur mikil sambönd innan flokksins og nýtur virðingar. Finnur er klókur og vís með að koma með nýja og óþekkta hugmynd að borðinu sem gæti höggvið á hnútinn.
Tíminn er hins vegar knappur því að flokksþingið hefst þann 14. febrúar, eftir minna en fjórar vikur.
