„Ég held að það sé ekki hægt að vera góður forseti nema maður sé maður sjálfur. Auðvitað er sumt sem maður þarf að gera sem forseti sem er kannski formlegra heldur en Halla, stelpan úr Kópavogi, er. Maður þarf stundum að sinna hlutverkinu og hlutverkið er stærra en maður sjálfur. En hlutverkið má ekki breyta manni í eitthvað annað en það sem maður er. Ég er bara og verð Halla, stelpan úr Kópavogi,“

segir Halla Tómasdóttir forseti Íslands í viðtali við Steinunni Ásu Þorvaldsdóttur í þættinum með Okkar augum.

Halla sem er sjöundi forseti Íslands tók við embættinu 1. ágúst 2024 og hefur því setið rúmt ár í embættinu. Áður starfaði hún sem rekstrarhagfræðingur, kennari og fyrirlesari á alþjóðavettvangi.

Aðspurð segist hún ekki ætla að láta embættið breyta sér, en á sama tíma hafi embættið breytt því að nú heyri fleiri þegar hún segir eitthvað sem skiptir hana máli.

„„Ég hef fleiri tækifæri til að vinna með öðrum að því að reyna að gera gagn og láta gott af mér leiða. Eins og til dæmis með riddara kærleikans. Margir koma með mér í það verkefni sem myndu kannski ekki gera það ef ég væri ekki forseti. En vonandi hefur það ekki breytt mér. Því ég vil bara vera Halla og ég er ekki hérna til að láta hlutverkið breyta mér, frekar kannski vil ég reyna að hafa áhrif á að embætti forseta Íslands geti haft meiri áhrif.“

Í kosningabaráttunni vakti hálsklútur Höllu og stuðningsmanna hennar mikla athygli. Segist hún hafa borið hálsklút í fyrsta sinn á ævinni í fyrstu kappræðunum.

„Það er svo fyndið að stundum færir lífið okkur bara óvænt merki. Þá var ég kvefuð og lasin og eiginlega raddlaus og setti á mig hálsklút. Einhvern veginn varð það að umræðuefni; sumum fannst hann geggjað flottur og öðrum fannst hann alveg hræðilegur. Allir höfðu skoðun á hálsklútnum,“ segir Halla sem ákvað að gera gott úr stöðunni og úr varð klútabyltingin svokallaða. „Maður getur tekið eitthvað sem er erfitt og sett smá húmor í það og haft gaman af.“

Heima fyrir á Halla dýrmætustu stundirnar við matarboðið með eiginmanninum Birni Skúlasyni og börnum þeirra, Tómasi Bjarti og Auði Ínu. Hún dásamar matseld Björns og segist rífa sig úr formlegu fötunum um leið og hún komi inn um dyrnar heima hjá sér og fari í „gamlar druslur“ eins og hún orðar það. „Helst mikið þvegnar og það er ekki verra ef það eru göt á þeim. Matarborðið er svolítið staðurinn okkar, þar sem mér líður eins og Höllu.“

Hún vonar að vera hennar í embætti forseta Íslands skili kærleiksríkara samfélagi þar sem allir fá notið sín. „Að ég eigi einhvern þátt í því að gera það með öðrum væri það sem ég myndi helst vilja skilja eftir mig.“

Horfa má á viðtalið í heild sinni hér.