Rithöfundurinn Margrét Tryggvadóttir furðar sig á frétt sem birtist í Morgunblaðinu í dag, en þar sé blaðamaður bókstaflega að fara með fleipur. Fréttin fjallar um að mögulega muni Alþingi funda fram í júlí og er fullyrt að slíkt sé án fordæma. Þar segir meðal annars: „Reglulegt fundarhald þingsins í júlí án fordæma“ og í texta fréttarinnar er rekið að það sé fátítt að Alþingi komi saman í júlí og að samfellt þinghald inn í sumarið sé „hins vegar óþekkt“.

Margrét vekur athygli á fréttinni á Facebook þar sem hún segir þetta rangt.

„Uhh nei! Ég hef enga trú á því að Mogginn og hans reynslumiklu blaðamenn viti ekki eða séu ekki færir um að fletta svona málum upp. Þing í júlí eru langt því frá fordæmalaus. Sumarið 2009 var til að mynda fundað allt sumarið fyrir utan tvær vikur í kringum verslunarmannahelgina og eins var þing viku í júlí sumarið 2013. Ég nenni ekki að fletta upp fleiri árum en er nokkuð viss um að dæmin eru fleiri.“

Árið 2009 urðu þinglok ekki fyrr en 28. ágúst og fóru reglulegir þingfundir fram allt sumarið fyrir utan tímabilið frá 24. júlí til 10. ágúst. Árið 2013 urðu þinglok 18. september og var fundað yfir sumarið allt fram til 5. júlí en þá var tekið hlé til 10. september. Þetta voru dæmin sem Margrét nefndi en á vef Alþingis má sjá fleiri dæmi um reglulega fundi fram í júlí, svo sem árið 2015 þegar reglulegir fundir stóðu til 3. júlí og árið 2000 stóðu reglulegir fundir til 2. júlí.