Hann segir að þeir hafi notfært sér Biden sem hafi þjáðst af „skertri vitsmunastarfsemi“.
„Joe Biden vildi ekki opin landamæri, hann talaði aldrei um opin landamæri, þar sem allskonar glæpamenn af öllum stærðum geta streymt inn í landið okkar,“ segir Trump í upphafi færslu á samfélagsmiðlinum sínum Truth Social.
„Það var ekki hans hugmynd að opna landamærin og næstum eyðileggja landið okkar og láta okkur borga mörg hundruð milljarða dollara til að losna við glæpamenn úr landinu okkar og fara í gegnum það ferli sem við erum nú í,“ bætti hann síðan við.
Því næst beindi hann ásökunum sínum að fólki sem stóð Biden nærri: „Þetta var fólk, sem vissi að vitsmunaleg starfsemi hans var skert, sem tók yfir sjálfvirka pennann (penni sem líkir eftir undirskrift fólks, innsk. blaðamanns). Þau stálu bandaríska forsetaembættinu og stofnuðu okkur í mikla hættu. Þetta eru föðurlandssvik á hæsta stigi!“
Síðan hélt hann áfram: „Þau gerðu þetta til að eyðileggja landið okkar. Sá Joe Biden, sem allir þekktu, myndi aldrei leyfa eiturlyfjasölum, meðlimum glæpagengja og andlega vanheilu fólki að flæða stjórnlaust inn í landið okkar. Allt sem maður þarf að gera er að skoða skjölin hans.“
Hann tekur síðan fram að þetta eigi að hafa afleiðingar að hans mati. „Eitthvað mjög alvarlegt ætti að koma fyrir þessa skúrka, sem vilja eyðileggja landið okkar en gátu það ekki af því að ég kom til sögunnar.“
Það þarf varla að taka fram að Trump lagði ekki fram neinar sannanir eða gögn sem styðja þessar staðhæfingar hans.
Þessi skrif hans komu í kjölfar þess að Joe Biden greindist með blöðruhálskrabbamein.
