Katrín Jakobsdóttir, formaður stjórnar Fasteigna Háskóla Íslands, og fyrrum forsætisráðherra og formaður Vinstrihreyfingarinnar, hélt glæpasagnanámskeið hjá Endurmenntun Háskóla Íslands í mars. 

Námskeiðið mæltist vel fyrir og var fullt hús nemenda sem voru afar áhugasamir og fróðir um námsefnið.

Sjá einnig: Katrín heldur glæpasagnanámskeið

Endurmenntun auglýsir nú annað námskeið með Katrínu, Íslenskar metsölubækur í 50 ár, sem haldið verður í fimm skipti frá 30. október til 27. nóvember.

Í námskeiðslýsingu er spurt: Hvenær fóru Íslendingar að fjalla um metsölubækur og birta metsölulista? Og hvaða bækur hafa ratað á þá lista?

Á þessu námskeiði verður fjallað um sögu metsölubókarinnar og fimm metsölubækur frá ólíkum tímum lesnar og bornar saman.

Á námskeiðinu er fjallað um

• Markaðssetningu og vinsældir bóka.
• Þróun skáldskapar frá áttunda áratug 20. aldar fram til okkar tíma og samhengi hans við samfélagsþróun.
• Ólíka strauma í vinsældum bóka.

Ávinningur nemenda mun verða aukinn skilningur á bókmenntasögu, aukinn skilningur á markaðssetningu bóka og hvað skapar vinsældir þeirra og djúplestur á ólíkum skáldsögum.

Námskeiðið er fyrir öll sem eru áhugasöm um samfélag og skáldskap og langar að skilja hvort tveggja betur.