Áslaug Arna Sigurbjörnsdóttir, þingmaður Sjálfstæðisflokksins og fyrrum ráðherra, hyggst taka sér leyfi frá þingstörfum næsta vetur og flytja til New York til að elta langþráðan draum sinn. Áslaug Arna mun leggja stund á MPA nám við Columbia háskóla næsta vetur. 

„New York er næsta stopp.

Kæru vinir.

Ég hef tekið ákvörðun um að hefja nám í Columbia háskóla í New York síðsumars eftir að ég fékk boð í vikunni um skólavist. Því fylgja flutningar til Bandaríkjanna og leyfi frá þingstörfum í 9 mánuði frá og með haustinu. Þar mun ég leggja stund á MPA nám (Master in Public Administration in Global Leadership).

Þetta hefur verið draumur lengi. Ég er reyndar manneskja margra drauma. Síðustu 10 ár hef ég gefið allt sem ég á í störfum mínum fyrir Ísland og Sjálfstæðisflokkinn.

Ástríða mín um að hafa jákvæð áhrif á samfélagið okkar er hvergi á undanhaldi. Ég trúi því að með þessu skrefi sé ég ekki að bara láta persónulegan draum rætast heldur líka að stækka sjóndeildarhringinn, bæta við mig þekkingu og reynslu sem mun án efa reynast mér mikilvægt veganesti inn í framtíðina.“ 

Sigurður Örn Hilmarsson mun taka sæti Áslaugar Örnu á þingi.

„Mér er þó enn efst í huga um þessar mundir þakklæti fyrir allan stuðninginn í stjórnmálunum síðustu ár og sérstaklega í vetur í aðdraganda landsfundar flokksins okkar. Tími og barátta sem ég mun aldrei gleyma. Lærdómsríkt ferðalag – jafnvel rússíbanareið – á svo marga vegu.“ 

Áslaug Arna segir að henni líði ótrúlega vel og dýrmætt sé að finna fyrir stuðningi hvað þessa persónulega ákvörðun hennar varðar. 

Segist hún hvergi nærri hætt í stjórnmálum og stóra verkefnið framundan eru sveitarstjórnarkosningarnar og að ná borginni að nýju. Þar þurfi Sjálfstæðismenn um allt land á stuðningi að halda.