Fastus hefur ráðið Gunnlaug Magnússon í stöðu deildarstjóra tæknideildar fyrirtækisins sem ber heitið Fastus expert. Gunnlaugur mun einnig taka sæti í framkvæmdastjórn Fastus.

Gunnlaugur er menntaður verkfræðingur og síðustu ár hefur hann starfað sem forstöðumaður Skiparekstrar Eimskips. Þar áður starfaði hann um árabil hjá Marel þar sem hann gengdi ýmsum hlutverkum, eins og segir í tilkynningu.

„Þetta er spennandi og um leið krefjandi verkefni í ört vaxandi fyrirtæki. Fastus expert sinnir mjög fjölbreyttum og sérhæfðum verkefnum fyrir viðskiptavini af fagmennsku og gæðum. Deildin sinnir allt frá uppsetningu og tækniviðgerðum yfir í reglubundið viðhald og eftirlitsheimsóknir. Við vinnum náið með viðskiptavinum og finnum lausnir sem tryggja áreiðanleika, hámarks árangur og rekstraröryggi. Viðskiptavinahópurinn er breiður enda þjónustum við meðal annars veitingastaði, hótel, mötuneyti, heilbrigðisstofnanir, matvöruverslanir, sjávarútveg og landbúnað,“ segir Gunnlaugur. 

Hjá Fastus Expert starfa 50 sérþjálfaðir tæknimenn. „Við rekum stærsta þjónustuverkstæði og varahlutalager landsins á okkar sviði. Verkstæðin okkar eru staðsett í Reykjavík, Akureyri og á Selfossi, en okkur er mikilvægt að bjóða upp á þjónustu sem nær til alls landsins,“ segir Gunnlaugur.