Sigurjón Magnús Egilsson ritstjóri Miðjunnar segir að Einar Þorsteinsson ætti að hætta sem borgarfulltrúi Framsóknar. Eins ætti Sigurður Ingi Jóhannsson að hætta sem formaður flokksins. 

„Það kann að verða sárt fyrir þá að viðurkenna eigin vanmátt. Einkum þó fyrir Sigurð Inga,“ segir Sigurjón í leiðara Miðjunnar.

Segir hann Framsókn þá skell enn og aftur, nú síðast í nýjustu könnun Gallupð um fylgi borgarstjórnarflokka.

Framsókn var sigurvegari síðustu borgarstjórnarkosninga, þegar flokkurinn fékk fjóra borgarfullrúa og borgarstjórastólinn.

„Fylgið týndist af Framsókn hægt og bítandi. Einar Þorsteinsson sagði af sér sem borgarstjóri. Allt kom fyrir ekki. Áfram hrundi fylgið af Framsókn. Þetta er alvarlegt mál.“

Sigurjón bendir á Framsókn er elstur allra flokka, stofnaður 1917.

„…og hefur aldrei áður þurft að þola aðra eins niðurlægingu og nú. Aldrei.

Hversu lengi ætlar flokkurinn að sökkva án þess að grípa í neyðarhemilinn? Er kannski pólitískt hlutverk Framsóknar búið? Horfið? Þá er fátt að gera annað en reyna af fremsta megni að breyta til.“

Sigurjón segir að kannski væri vit fyrir flokkinn í að leita aftur til samþykkta flokksþingsins frá 2009 þegar samþykkt var að sækja um aðild að Evrópusambandinu. Sigmundur Davíð var kjörinn formaður flokksins á sama þingi.

„Einar Þorsteinsson ætti að hætta sem borgarfulltrúi. Eins ætti Sigurður Ingi að hætta sem formaður. Það kann að verða sárt fyrir þá að viðurkenna eigin vanmátt. Einkum þó fyrir Sigurð Inga. Mann sem eitt sinn var forsætisráðherra. Fékk embættið reyndar ódýrt. Sigmundur Davíð varð að segja af sér og sem varaformaður fékk Sigurður Ingi forsætisráðuneytið.

Nú er staðan alvarleg. Framsókn hangir á hálmstrái sem er við það að slitna. Þetta kann að verða spurningar upp á líf og dauða hjá elsta stjórnmálaflokki þjóðarinnar, Framsóknarflokki sem var stofnaður árið 1917. Tímabært er fyrir Einar borgarfulltrúa að bretta upp ermarnar.“