Þetta er meðal þess sem kemur fram í viðtali sem Þórður Snær Júlíusson, framkvæmdastjóra þingflokks Samfylkingarinnar, tók við Oddnýju og birtist á vefnum Kratinn.is.
Oddný var á þessum tíma þingflokksformaður Samfylkingarinnar og vissi hún að breytingar væru yfirvofandi á ríkisstjórninni. Hún rifjar svo upp eftirminnilegan þingflokksfund þar sem Jóhanna Sigurðardóttir, þáverandi forsætisráðherra, tilkynnti breytingarnar.
„Ég er að stýra fundi og gef Jóhönnu orðið og hún segir: „Við höfum ákveðið breytingar á ríkisstjórn og niðurstaðan er sú að Oddný Harðardóttir verður fjármálaráðherra,“ er haft eftir Oddnýju í viðtalinu og hún bætir við að þetta hafi aldrei verið orðað við hana fyrr en þarna.
Þetta kom Oddnýju eðlilega á óvart.
„Það kom yfir mig einhver svona dauðadoði held ég og það var svona – „Já, hvað geri ég nú?“ Ég ákvað að taka eitt skref í einu og klára þennan fund, tók niður mælendaskrá og gaf fólki orðið,“ segir Oddný í viðtalinu sem má nálgast í heild sinni hér.
Fram kemur að eftir þennan vinnudag hafi hún ekið heim til sín í Garðinn og ákveðið að fara út á Garðskaga til að horfa á hafið áður en hún ræddi við fólkið sitt. Þegar hún ók inn í bæinn sá húna ð margir íbúar voru búnir að flagga í tilefni þess að þeirra kona væri orðin fjármálaráðherra.
„Síðan þurfti ég bara að glíma við það verkefni. Það var mjög lærdómsríkt og eftir situr þekking sem ekki verður frá mér tekin,“ segir hún meðal annars.
