Össur Skarphéðinsson, fyrrverandi ráðherra, leggur til að Sósíalistaflokkur Íslands velji nýjan foringja til að koma þeim út úr öldurótinu. Sá foringi er reyndar margreyndur í hettunni og ekkert unglamb.

„Albaníu-Valda til valda,“ segir Össur í færslu á samfélagsmiðlum í dag og vísar til Þorvalds Þorvaldssonar, formanns Alþýðufylkingarinnar. Tilefnið eru fréttir af því að þúsund manns hafi sagt sig úr Sósíalistaflokknum.

Vargöldin í Sósíalistaflokknum sem ríkt hefur undanfarna mánuði og náði hámarki um liðna helgi með kjöri nýrrar stjórnar hefur vart farið fram hjá nokkrum manni. Armur stofnandans Gunnars Smára Egilssonar varð undir í því kjöri og fleiri andlit hafa látið sig hverfa eða sett sjálfa sig til hliðar, svo sem Sanna Magdalena Mörtudóttir borgarfulltrúi.

Eftir situr nær óþekkt fólk með völdin og flokkurinn er stórlaskaður, sér í lagi vegna þess að barningurinn hefur allur farið fram fyrir opnum tjöldum. Össur leggur hins vegar til nýjan foringja.

„Er ekki tilvalið að gera Albaníu-Valda að pólitískum leiðtoga í Sósíalistaflokknum fyrst Sanna Magdalena valdi Gunnar Smára fremur en leiða flokkinn?“ segir Össur. „Hann hefur svör við öllu enda unnið fjölmargar spurningakeppnir, þaulvanur byltingarmaður sem kann bæði marxisma og lenínisma út og inn, og stóð sem klettur með æskuuppreisninni gegn Gunnari Smára. Svo er hann sagður allra manna skemmtilegastur í partíum. Er til betri uppskrift að byltingarforingja?“ spyr hann.