Jón Pétur Zimsen alþingismaður Sjálfstæðisflokksins og fyrrum skólastjóri segir í nýrri færslu á samfélagsmiðlinum X hópi, sem hann kallar „fullorðin smábörn“ til syndanna.

Jón Pétur fer ekki út í nákvæma skilgreiningu á þessum hópi fyrir utan að lýsa honum þannig að þarna sé á ferðinni fólk sem hafi lítið þroskast síðan það lauk grunnskólagöngu sinni:

„Fátt er verra en fullorðið smábarn. Fólk sem þroskast lítið á vegferð sinni í gegnum lífið. Fullorðin smábörn enda því oft sem bitrir, hrokafullir einstaklingar fullir af eftirsjá. Þessi hópur einstaklinga ,,toppar“ oft í grunnskóla en síðan molnar hratt undan öllu hjá þeim.“

Jón Pétur segir það alveg ljóst hvernig lýsa megi lífi fólks í slíkri stöðu:

„Það er sóun á lífshlaupi að finna ekki tilgang, takast ekki á við ábyrgð eða að taka ekki þátt í lýðræðinu.“

Þingmaðurinn virðist telja það enn fremur  gefa augaleið hvað einkenni daglegt líf „fullorðnu smábarnanna“ og leggur til leiðir til að gera breytingar:

„Ef þú ert á vondum stað taktu fyrsta skrefið til bata með því að vinna litla sigra s.s. hringja í foreldra þína, fara út með ruslið, minnka tölvuleiki um 30%, ganga 500m og standa við það sem þú ætlar þér (sem er öfugt við forðun). Það er ótrúlegt hvað litlir hlutir geta gefið fólki mikið, vöxum og þroskumst.“

Fátt er verra en fullorðið smábarn. Fólk sem þroskast lítið á vegferð sinni í gegnum lífið.

Fullorðin smábörn enda því oft sem bitrir, hrokafullir einstaklingar fullir af eftirsjá.

Þessi hópur einstaklinga ,,toppar“ oft í grunnskóla en síðan molnar hratt undan öllu hjá þeim.…

— Jon Petur Zimsen (@JPZimsen) March 9, 2025