Samkvæmt nýrri könnun sem Prósent vann fyrir hlaðvarpið Bakherbergið vill um fjórðungur þjóðarinnar, eða 24% landsmanna, sjá Kristrúnu Frostadóttur, formann Samfylkingarinnar, sem næsta forsætisráðherra. Næstur á eftir Kristrúnu er Sigmundur Davíð Gunnlaugsson, formaður Miðflokksins, sem 9 prósent landsmanna vilja í forsætisráðuneytið.
Athygli vekur að núverandi forsætisráðherra, Bjarni Benediktsson, nær ekki einu sinni þriðja sætinu. Fleiri landsmenn vilja Ingu Sæland, formann Flokks fólksins, sem forsætisráðherra heldur en vilja sjá Bjarna halda embættinu, en 6 prósent sögðust vilja Ingu á meðan bara 5 prósent nefndu Bjarna. Þorgerði Katrínu Gunnarsdóttur, formann Viðreisnar, vilja 5 prósent sjá sem forsætisráðherra og 4 prósent nefndu Áslaugu Örnu Sigurbjörnsdóttur, háskóla-, iðnaðar- og nýsköpunarráðherra, 3 prósent vilja Þórdísi Kolbrúnu Reykfjörð Gylfadóttur, utanríkisráðherra, 3 prósent nefndu Sigurð Inga Jóhannsson, formann Framsóknarflokksins, 3 prósent Þórhildi Sunnu Ævarsdóttur, þingmann Pírata og 2 prósent nefndu Sönnu Magdalenu Mörtudóttur, borgarfulltrúa Sósíalista. Enginn þingmaður Vinstri Grænna náði prósenti í könnuninni.
Þessar niðurstöður eru í anda könnunar Maskínu um fylgi flokka þar sem Samfylkingin mældist stærst með 25,5 prósent fylgi og Miðflokkurinn næstur með 15,3 prósent fylgi.
