Könnunin fór fram dagana 12. til 16. apríl og voru svarendur 1.020 talsins. Þátttakendur voru dregnir með tilviljun úr Þjóðskrá og eru alls staðar að af landinu, 18 ára og eldri.
31,4% aðspurðra segjast ætla að kjósa Katrínu í forsetakosningunum sem fram undan eru en 24,0% segjast ætla að kjósa Baldur. Jón Gnarr kemur svo þar á eftir með 18,9% fylgi.
Fylgi allra þessara þriggja frambjóðenda lækkar á milli kannana en síðasta könnun var birt 8. apríl. Halla Hrund Logadóttir, sem kemur þar á eftir þessum frambjóðendum, virðist vera að sækja í sig veðrið og mælist fylgi hennar nú 10,5% en var 5,7% í síðustu könnun.
Halla Tómasdóttir er með 6,7% fylgi en aðrir frambjóðendur eru með undir 5%. Í þeim hópi eru Arnar Þór Jónsson, Steinunn Ólína Þorsteinsdóttir, Ásdís Rán Gunnarsdóttir, Ástþór Magnússon, Sigríður Hrund Pétursdóttir, Guðmundur Felix Grétarsson og Helga Þórisdóttir. Aðrir frambjóðendur sem ekki eru nefndir hér eru samanlagt með 0,2% fylgi.
