Nú eru aðeins nokkrar vikur í að framboðsfrestur rennur út þann 26. apríl næstkomandi og leikar því farnir að æsast. Stærstu tíðindi síðustu daga voru eflaust þau að Ólafur Jóhann Ólafsson, rithöfundur og fyrrum forstjóri, gaf það út að hann myndi ekki sækjast eftir embættinu.
Nafn hans hefur farið hátt frá áramótum og ljóst að hann hefði orðið sterkur kandídat í kosningunum.
Baldur Þórhallsson og Halla Tómasdóttir eru tvö önnur nöfn sem hafa verið ofarlega í umræðunni en allt bendir til þess að þau láti slag standa. Halla hefur boðað til blaðamannafundar í hádeginu þar sem gera má ráð fyrir að framboði verði lýst yfir.
Sterkt teymi hefur svo myndast í kringum framboð Baldurs en tæplega 20 þúsund manns skráðu sig á stuðningsmannasíðu framboðsins á stuttum tíma sem var eftirtektarverður árangur.
Þá hefur verið hávær umræða um framboð Katrínar Jakobsdóttur, forsætisráðherra, en verði af því má búast við því að framboðið líti ekki dagsins ljós fyrr en á lokametrunum.
Sjá einnig: Niðurstöður síðustu könnunar
Aðrir hugsanlegir frambjóðendur eru Jón Gnarr, Alma Möller, Eyjólfur Guðmundsson og Salvör Nordal. Er borgarstjórinn fyrrverandi þar líklegastur en hann hefur gefið það út að ákvörðunin verði kynnt í kringum páskana.
Þeir frambjóðendur sem þegar hafa lýst yfir framboði eru ekki taldir líklegir til stórræðna í kjörinu. Þó ber að nefna það að Arnar Þór Jónsson, lögfræðingur, á afar dygga stuðningsmenn sem hafa gert það að verkum að hann skilar góðum niðurstöðum í vefkosningum sem þessum.
Við spyrjum því í þriðja sinn:
