Björn Bjarnason, fyrrverandi ráðherra, saknar flokksfélaga síns í Sjálfstæðisflokknum Óla Björns Kárasonar. Óli Björn hættir bæði á þingi og sem greinahöfundur í Morgunblaðinu.

„Óli Björn er í hópi þeirra sem munaði um í þingstörfum vegna málefnalegrar afstöðu og áhrifa í þágu hugsjóna,“ segir Björn í pistli á heimasíðu sinni bjorn.is

Óli Björn sat á þingi frá árinu 2016 og var þingflokksformaður árin 2021 til 2023. Hann hefur skrifað greinar í Morgunblaðið frá árinu 2012, sem eru næstum því 500 talsins.

„Af skrifum hans mátti ráða að hann hefði sagt af sér formennsku í þingflokknum vegna þess að honum þótti nóg um samstarfið við VG: Það væri ekki unnt að teygja sig endalaust í málamiðlunum við þingmenn flokksins eða verja stjórnarathafnir þeirra,“ segir Björn og tvinnar stjórnmálaástandið í dag við brotthvarf Óla Björns. „Í hugum margra tóku viðvörunarljósin að blikka hraðar vegna þreytu Óla Björns á stjórnarsamstarfinu. Í lokagrein sinni á þeim vettvangi sem hann hefur haft í Morgunblaðinu undanfarin 12 ár vekur hann athygli á þeirri staðreynd að nú sé stefnt að vinstristjórn þrátt fyrir að hægri vindar hafi blásið á kjördag.“

Björn bendir á að rúmur helmingur þingheims, 33 þingmenn, hafi horfið af Alþingi í kosningunum í ár. Annað hvort vegna þess að þeir buðu sig ekki fram eða nutu ekki stuðnings kjósenda til áframhaldandi setu. Tveir heilir þingflokkar hurfu alveg, Vinstri græn og Píratar.

„Nýtt þing verður með nýjum svip þegar það kemur saman. Það munar misjafnlega mikið um framlag þeirra sem hverfa úr þingsölunum,“ segir hann.