Miðað við skoðanakannanir þá stefnir í hnífjafnar forsetakosningar í Bandaríkjunum í næstu viku. En þótt staðan sé hnífjöfn, miðað við kannanir, þá útilokar það ekki að annar frambjóðandinn vinni stórsigur.

Harry Enten, sem er talnagúru CNN sjónvarpsstöðvarinnar, segir að nú séu 60% líkur á að annar frambjóðandinn sigri í öllum sjö sveifluríkjunum. Ef það gengur eftir fær sá frambjóðandi rúmlega 300 kjörmenn en það þarf 270 kjörmenn til að sigra. Úrslit af þessu tagi væru því í raun „stórsigur“.

Enten segir að fylgi Donald Trump og Kamala Harris sé nú svo jafnt í öllum sveifluríkjunum sjö að ef sveiflan verður í sömu átt í þeim öllum, þá sigri viðkomandi frambjóðandi í þeim öllum.