Valgerður Árnadóttir, varaþingmaður Pírata, gefur kost á sér áfram fyrir komandi alþingiskosningar og segist eiga þann draum að verða matvælaráðherra.

„Já ég veit.. það er ekki vinsælt djobb, en ég er tilbúin að taka það á mig!

Til að klára þá baráttu að banna hvalveiðar og friða hvali við Íslandsstrendur, til að taka styrkum höndum á þeim vanda sem sjókvíaeldi er, til að móta kerfi sem hugar að velferð dýra fyrst og fremst,“ 

segir Valgerður í færslu á Facebook.

Valgerður vill breyta styrkjakerfi til bænda og annarar matvælaframleiðslu, móta skilvirkt kerfi eins og þekkist hjá öðrum Evrópuríkjum, sem veitir bændum aukin tækifæri til að ráða sjálfir hvað þeir rækta og sem hvetur til aukinnar nýsköpunar og grænna verkefna.

„Við lifum á víðsjárverðum tímum loftslagsbreytinga og stríðsátaka og við þurfum að stuðla að auknu fæðuöryggi og nota okkar grænu orku í meiri mæli til matvælaframleiðslu.

Ég hef verið varaþingmaður síðastliðin þrjú ár og fjórum sinnum veist sá heiður að taka sæti, unnið alls 3 vikur og 1 dag á þingi, en á þeim stutta tíma hef ég lagt fram frumvarp um aukna kornrækt, tvívegis lagt til tilfærslu dýraeftirlits frá Matvælastofnun til sjálfstæðs dýravelferðarsviðs og lagt fram stefnu Pírata um dýrahald og velferð dýra. Að auki hef ég lagt fram fjölda fyrirspurna er varða starfsmannaleigur, útvistun verkefna á vegum ríkisins, velferð dýra, grænmetisrækt, grænkerakost í ríkisstofnunum, um umboðsmann náttúrunnar og skuldbindingar Íslands í loftslagsmálum.“

Valgerður segir Pírata ætla sér að vera hluti af ríkisstjórn eftir þessar kosningar, þar geti hún nýtt krafta sína til að sameina fólk, „eins og ég gerði þegar ég fékk öll helstu náttúru- og dýraverndarsamtök landsins til að taka höndum saman í hvalveiðibaráttunni.

„Það er kominn tími á ríkisstjórn sem ætlar sér að byggja upp réttlátt samfélag með velferð, mannréttindi og grænar áherslur að leiðarljósi.

Við Píratar erum tilbúnir og ég er svo sannarlega tilbúin til að láta til mín taka.

Ég heiti Valgerður Árnadóttir og ég býð mig fram í prófkjöri Pírata í Reykjavík.“

Hvetur Valgerður fólk til að kjósa í prófkjöri Pírata um helgina.