Trump er hataður og elskaður en óháð því hvað fólki finnst um hann, þá er almenn samstaða um að hann búi yfir sérstökum hæfileika til að gera út af við orðspor fólks. Hann virðist ná sífellt betri tökum á þessari kúnst og nú hefur hann fundið smáatriði í æviágripi Kamala Harris sem hann hefur stungið hnífnum í og reynir að stilla henni upp sem lygara.
Allt snýst þetta um franskar kartöflu og virðist þetta vera byrjað að virka hjá Trump.
Harris hefur margoft sagt frá því að áður en hún fékk fyrsta starf sitt sem lögmaður á níunda áratugnum, hafi hún starfað um skamma hríð á veitingastað McDonald‘s.
Ef hún sigrar í forsetakosningunum, verður hún fyrsti forsetinn sem hefur unnið á McDonald‘s veitingastað.
Það eru þeir fátækustu og lægri millistéttin sem sækja McDonald‘s staðina mest og það er því engin tilviljun að Harris segi frá starfi sínu hjá þessari þekktu skyndibitakeðju.
„Hugsið um það. Tvo börn úr millistéttinni. Stúlka frá Oakland í Kaliforníu, sem var alin upp af vinnandi móður. Ég var í sumarstarfi á McDonald‘s,“ sagði Harris.
Hún ber þar með uppvöxt sinn saman við uppvöxt Trump í ríkidæmi og reynir að draga upp þá mynd að Trump sé ekki í tengslum við hinn almenna borgara en það sé hún hins vegar.
Trump hefur heldur betur gripið þetta á lofti og heldur því fram að um lygi sé að ræða en eins og yfirleitt hjá honum, þá færir hann engar sannanir fyrir því.
„Hún er lygari. Hún vann ekki á McDonald‘s. Hún sagðist hafa unnið á McDonald‘s, er það ekki?“ sagði hann á kosningafundi í Tucson í Arizona. Hann lét síðan svipuð orð falla á kosningafundi í Pennsylvania.
Á kosningafundi í Norður-Karólínu gerði hann grín að frásögn Harris og sagði hana ljúga og að hann muni sjálfur fá sér vinnu á McDonald‘s. „Ég sé um frönsku kartöflurnar,“ sagði hann fundargestum til mikillar skemmtunar.
Með þessu breiðir Trump úr sögu um að Harris sé lygari og þessi frásögn hans er að ná góðri fótfestu. Aðferðinni hefur hann beitt margoft en hún gengur einfaldlega út á að endurtaka sömu lygina nógu oft og þar með nær hún fótfestu sem sannleikur, að minnsta kosti í huga margra.
